Zonguldak de ocaxêkê madenî yê qeçaxî de karkero koçber o afgan Vezîr Mohammed Nortan wextê karî de xora şibi, dima waştişê patronan ser o amebi kiştene û cenazaya ci seba ke ocaxo qeçax eşkera nêbo daristan de amebî vêşnayene. 

Komîsyonê Kede, Ekolojî û Komîsyonê Multecî û Koçberan ê HEDEPî derheqê babete de  eşkerayîyêke daye. Eşkerayîye de dîya zanayene ke patronanê ocaxê qeçaxî ra Hakan Kornoş Serekê MHPyî yê bajarekê Gelîkî yo.

HEDEPî vat: ''Karkero multecî yo afgan Vezîr Mohammed Nortan waştişê patronan ser o ame kiştene û cenazaya ci ameye vêşnayene. Seba ke tehqîqatê nê serebûtî bi xurtî bêro kerdene, patronê ocaxê qeçaxî bêrê cezakerdene ma do prosesî teqîb bikerê. Seba ke versûcî bêceza nêmanê ma do têkoşîn bikerê. Ma do hesabê nê kerdişî rêxistinanê xo reyde bipersê. Ganî ma paştî bidê keye û embazanê Nortanî.''