Hemsereka HEDEPî ya Hatayî û Endama Meclîsê Partîye Hulya Ateş Koç ANFyî rê derheqê Kongreya HEDEPî ya verêne de qisey kerd.

Hulya Ateş da zanayene ke kongre de teyna nameyê partîye nêvurîyayo, derheqê xeylêk babetan de nîqaşî ameyê kerdene û qerarî gêrîyayê. Hulya Ateş vat: ''Dewaya qefilnayîşê partîye, gef û şantajê vera ma xora bîyî sebebê gêrayîşê alternatîfan. Kongre seba waranê cîyayan bîye zemînê prosesanê neweyan. Hatay bi awanîya xo ya pirziwanî, pirbawerî û pirkulturele bajarekêkê wayîrê cewheran o. Heyf ke erdlerzî ra dima şarî neçarî ra koç kerd. Kongre de bale ameye antene newera awankerdişê Hatayî ser. Ney zî hêvî û hêz dayî şarê Hatayî.''

Hulya Ateş îfade kerd ke Meclîsê Partîye yê HEDEPî de bi giranî cinîyî cagênê û cinîyî mîyanê sîyasetî de serkêşîye kenê. Hulya Ateş vat: ''Seba ganîkerdişê paradîgmaya partîye giranîya cinîyan biqîmet a. Ma do vera îqtîdarî, şîdetî, zorbazî, îstîsmarî û serdestîya camêrdan pêro waran bi rengê cinîyan vurnenê.''

Hulya Ateş pê hesna ke erdlerzî ra dima Hatayî koçêko pîl dayo û vat: ''Erdlerzê Hatayî de tay cayî zaf rijîyayî, tayênî tay rijîyayî û tay cayê bînî zî qet nêrijîyayî. Bi taybetî Defne, Samandag, Antakya, Îskenderûn û Karaagaç de rijîyayîş giran bi ke nê cayan de muxalefet bitesîr bi. Heyf ke erdlerzî ra dima herinda ke şarî rê cayê neweyî bêrê viraştene şarî dîya koçkerdene. Sey HEDEPî ma do wextê verê ma de xebatanê xo yê paştdayîşî rê dewam bikerê. Ma do Hatay de prosesê weçînayîşanê herêmîyan şarî reyde bîyarê ca û îdareyanê xo yê herêmîyan bi cinîyan hîna xurtêr bikerê.''