Tirkîya de derd û dejê koçberan nêqedîyenê. Nê koçberan ra yewe zî Asmaa Hachem a ke Fasî ra ya. Kênaya ey hetê Xizmetanê Komelkîyan ra bi zorî tira ameye girewtene. Asmaa Hachema ke seba kênaya xo têkoşîn kena çar rojan ra nata Merkezê Apeyşawitişî yê Selîmpaşayî de tepişîyena. Hemsereka Pêroyî ya Komeleya Heqanê Merdiman (ÎHD) û avûkate Erene Keskîn seba ke Asmaa Hachem sînorî ra nêra teberkerdene kewte dewre.

Erene Keskîn derheqê babete de ANFyî rê qisey kerd.

Erene Keskîna ke têkoşînê Asmaa û kênaya ci Alya dîyo ard ziwan ke bê waştiş û destûrê Asmaa kênaya ci tira ameya girewtene û dîyaya keyeyêkî. Keskîne da zanayene ke Asmaa mengan ra nata seba ke kênaya xo apey bigêra têkoşîn kena. Erene Keskîn vat: ''Na zorbazî û bêhuqûqî ya ke domanî bê destûrê dadîye yenê girewtene. Asmaa rê destûr dîya ke tena mengêke de rayêke kênaya xo bivîna. Ma kenê ke Asmaa rê bibê hetkar. La seba ke belgeyê ci yê hewceyî çin ê, a nêeşkena wekalet bida ma. 

Tewr peyên ma eşnawit ke a ameya berdene bi Selîmîye. No zî binpaykerdişêkê heqan o ke dadîyêka ke seba domana xo têkoşîn kena, ha yena teberkerdene. Ez venga Wezîra Xizmetanê Komelkîyan û Keyeyî Mahînure Ozdemîr Goktaş dana ke cade karê apeyerşawitişî vindarna. Seba ke Asmaa domana xo bigêra çi hewce yo wa bêro kerdene.''