Hetê Komîsyonê Hemwelatîyanê Tirkîya yê Ewropa (EUTCC) ra Parlamentoyê Ewropa de bi sernameyê 'Tirkîya de tepişteyê sîyasîyî: Rayîrê haştîye û azadîye şino ça' ame kerdene.  Xeylêk kesê namdarî, temsîlkarê dezgehan û sîyasetmedarî tewrê konferansî bîyê ke mîyanê înan de ronayoxê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' zî est bîyê.

Konferans de avûkatanê Rayberê Şarê Kurdî Abdullah Ocalanî ra Rêzan Saricayî derheqê sîstemê Îmraliyî de qisey kerd. Saricayî pare kerd ke Zîndanê Îmraliyî de huqûq nêno caardene û krîterê mîyanneteweyîyî yenê binpaykerdene. Saricayî bale ante bêvengîya CPTyî ya vera tecrîdî ser û vat: ''Polîtîkayê ke vera Ocalanî yenê caardene vurîyayê bîyê rejîmê Tirkîya. ''

Wezîrê Îzlanda yê verênî Ogmundur Jonassonî îfade krd ke Abdullah Ocalan ganî cade bêro azadkerdene û meseleya kurdan bi şerî ney bi muzakere û dîyalogan do bêra çareserkerdene.

Dima beşdaran derheqê dewrê neweyî yê Hemleya 'Ocalanî rê Azadîye' de nîqaşî kerdî. Nîqaşan ra dima netîcenameyê konferansî ame eşkerakerdene. Netîcename de nê birî ameyî girewtene:

''-Konferansê ma pare kerd  ke tecrîdê Îmraliyî qetî nêno qebulkerdene. Konferansê ma bi zelalî destek dano Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye.'

-Ganî cade tecrîdê Îmraliyî bêro wedaritene û Konseya Ewropa seba pêvînayîşê bi Ocalanî bêrê kerdene mudaxele bikera.

-Ma venga CPT, Meclîsê Parlamenteran ê Konseya Ewropa û Neteweyanê Yewbîyayeyan danê ke heyetêkê xoserî cade bişawê Îmraliyî.

-Ganî medya de eşnawîyayîşê rewşa Îmraliyî hîna zaf xîretî bêrê kerdene.

-Ganî sendîkayî seba ke bale biancê rewşa tepişteyanê sîyasîyan ê Tirkîya deqayêk grevê pêroyîyî bikerê. Ganî avûkatî bi rayîrê baroyanê xo Wezîrîya Edaletî ya Tirkîya û dezgehanê huqûqî yê Tirkîya de têkilîye ronê.

-Seba ke babeta tecrîdî rojdem biba xîretî wa bêrê kerdene.

-Ganî vera Tirkîya ambargo bêro caardene û seba ke Tirkîya vera kurdan sûcan nêkera ci rê çekî nêrê rotene.

-Seba ke Abdullah Ocalan çareserîya meseleya kurdan de rolê xo bîyaro ca ganî bêro azadkerdene.''