Parlamentera Partîya Demokratîke ya Şaran ( HDP) ya Colemêrgî û hemsereka Kongreya Demokratîke ya Komelî (KCD) Leyla Guvene bi sîstemê SEGBİSî tewrê roniştişê çarinî yê mehkemaya ci ke Edlîyeya Amede dî ameye dîyayene, bîye.

Guvene da zanayene ke bi sebebo ke hukm qeraranê bêhuqûqî gêno a tewrê roniştişê mehkemaye nêbena, la ewro vejîyaya ke bido zanayene ke aye dest bi grevê vêşanîye kerdo.

Guvene bale ante tecrîdo girankerde ke Rayberê Şarê Kurdî Abdullah Ocalanî ser o û va: “No tecrîd tena kesêk rê nê şarêk rê yeno kerdene. Mi bi felsefeya Rayberê PKKyî Abdullah Ocalanî  sîyasetî de aktîf ca girewt. Ez zî sey leteyêkê nê şarî na çalakî dana destpêkerdene. Tecrîd sucê merdimîye yo. Heta xoserbîyayîşê hukmî û wedartişê tecrîdî çalakîya mi do dewam bikero. Eke hewce bikero ez çalakîya xo açernena roceyê mergî.”