10 kesê bînî ke Xelfetî ya Riha de ameybî destbendekerdene ameyî berdene bi Edlîyeya Riha. Abdullah Buga, Abdurrahman Çîftçî, Ahmet Yildirim, Alî Zencîrkiran, Kenan Yildirim, Mehmet Kaçar, Mehmet Hayrî Çîftçî, Musta Çîftçî, Muslum Yildirim û Sînan Yildirim ê ke bi îdîaya “hetkarîye dana rêxistine” îfade dayo dozgerîye, bi waştişê ‘şertê kontrolê edlî ameyî berdene bi Dadgerîya Ceza ya Sûlhî ya Riha.

Qalê îşkenceyî kerd: Feleqa, girêdayîş, paşkul

Heme kesanê ke îfade dayo dadgerî waştişê ''şertê kontrolê edlî'' red kerd, waşt ke bêrê verdayene, Mehmet Hayrî Çîftçî û Mustafa Çîftçîyî qalê îşkenceyo ke înan rê ameyo kerdene kerd, seba raporê waşt ke înan bişawê Dezgeyê Tibê Edlî.

Çîftçîyî îfadeyê xo de vat cendirmeyan îşkencê bi ci kerd, panya leşa ci da, serê leşa ci de rêçê jopan estê, bi jopan dayo bêçikan û linganê ey ro û o kerdo feleqa. Çîftçîyî hetê bînî ra vat, asayîşî de çimê ey padayê, o di qatî berdo cor û elektrîk dayo organê ey ê cinsî, dest û payê ey girê dayê û o kuyayo. Çîftçî do derheqê têkildaran de gerre bikero û waştişê kontrolê edlî nêwaşt. Qeydanê mehkeme de zî wina ame vatene: “Muşahedeyê mehkeme de ame dîyane ke serê doşa rasta gumankerdeyî de rêçêka bi 10 cm ya sîyaye ameye dîyayene.”

Avûkata Hayrî Çîftçî vat dosya de delîlêka şênbere çin a, waşt ke waştişê kontrolê edlî bêro wedaritene û raporê Tibê Edlî bêro girewtene.

Mustafa Çîftçîyî zî vat wextê destbendkerdişî de îşkencê bi înan ameyo kerdene, çimê ey dayê girê, nêzano bi elektîrîk yan zî bi dest dayo ey ro, labelê mîya ey dejena. Çîftçîyî da zanayene ke cendirmeyan bi paşkul û çopolan o kuyayo, niak goşê ey dejeno û vat o do gerre bikero. Çîftçîyî waştişê şertê kontrolê edlî red kerd.

Qerar

Mehkeme qerar da ke Kenan, Muslum, Sînan û Ahmet Yildirim û Mehmet Hayrî Çîftçî hewte de rojêk îmza bidê, bi şertê kontrolê edlî bêrê verdayene, seba Abdullah Boga, Abdurrahman Çîftçî, Mehmet Kaçar, Mustafa Çîftçî û Alî Zincîrkirinî zî hewcadarîya bi şertê kontrolê edlî nêdîye, vejîyayîşê înan ê teberê welatî qedexe kerd.

Kesêk amebi girewtene

Serebutanê Xelfetî de kesanê ke ameybî destbendkerdene ra 10 kesî ameybî berdene bi mehkeme, 9 ci ra ameybî verdayene, Abdullah Çîftçî zî parekerdişê ey ê serê medyaya sosyale ra bi îdîaya ''propagandaya rêxistine kerda ' ra amebi girewtene. Êyê ke ameyê destbendkerdene bi gurbanê 10 kesan yenê berdene bi mehkeme