Hepsîyan vera tecrîd û qerarê MHME de reaksîyon nîşan da û wina vatî: “Ma do mehkemeyan de bale biancî tecrîdî ser û redbîyayîşê muracatê Abdullah Ocalanî ser o dezgehanê Konseyê Ewropa, Wezîrîya Edaletî û Mehkemeya Heqê Merdiman ya Ewropa rê faksan bierşawî.”

Ser nameyê hepsîyanê PKK û PAJKî Denîz Kayayî îzehetêk da. Îzehetê Kayayî wina yo:

MA TESLÎM NÊBENÎ

“Ma têkoşînê xo seba cuyêka manayine domnenî û ganî bêro zanayene ke ma do vera faşîzmî de xover bidî. Ma vera her tewir kehenperestîya ke vernîya bawerîya ma de astengî virazena de yî. Beno ke ma şerê azadîye de esîr kewtî destê faşîzmî, labelê ma teslîm nêbenî. Ma bi serran vera îşkenceyanê îttîfaqê faşîstî yê AKP û MHPyî de xover da û sere nêrona. Senî ke xoverdayîşê 14ê temmuze vera faşîzmî de serkewt, ma zî do serbikewî. Seba azadîya şarî û berzkerdişê xeta serkewtişî wezîfe û berpirsîyarîya ma yî.

GANÎ NA BÊVENGÎYE BIQEDÎYA

Seba ke bêvengîyêka girde esta, hukmatê Erdoganî heme çî xo rê meşrû vîneno. Cok ra yê ke xo ra vanî demokrat, roşnvîr û entelektuel ganî vera na bêvengîye de bivinderî. Wa bêro zanayene ke Rayberê ma vera tecrîdo giran de xover dano. Ma hepsîyê PKK û PAJKî zî 10 hezar ra zêde yî, ma do tecrîdî qebul nêkerî.

HEWL DANÎ TECRÎD MEŞRÛ BIKERÎ

Mehkemeya Heqê Merdiman ya Ewropa vatişanê dewletan qebul kena û sîstemê tecrîdî ke serra 1999î ra nata esto, nêvînena. Qeraro ke ame dayene, yeno manaye meşrûkerdişê tecrîdî. No zî nîşan dano ke tecrîd Ewropa, Mehkemeya Heqê Merdiman ya Ewropa û CPT ra qerfîyaye nîyo. Ma hepsîyê PKK û PAJKî do seba ke tecrîd û nê qerarî protesto bikerî, mehkemeyan de qala tecrîdî bikerî. Reyna ma do Mehkemeya Heqê Merdiman ya Ewropa, Konseyê Ewropoa û Wezîrîya Edaletî rê faksan bierşawî. Ma veng danî şarê xo û heme merdimîye ke wa vera nê rejîmê faşîstî de veng bivejî û xover bidî.”