15 tepişteyanê koma destpêke ya rojeyê mergî ra yew zî Îhsan Bûlût o. Pîyê Îhsan Bûlûtî Ahmet Bûlûtî ard ziwan ke o qerarê lajê xo rê hurmet ramojneno û bale ante serê muhîmîya paştdayîşê şarî ser.

15 tepişteyanê ke hemverê tecrîdkerdişê Ocalanî de kewtî rojeyê mergî, înan ra yew zî Îhsan Bûlût o. Îhsan Bûlût Zîndanê Wanî yê bi Asayîşê Berzî de yeno verdayene. Keyeyê ê qezaya Berwarî ya Sêrtî ra yo. Serra 1999 de gama vengkerdişê dewan de seba ke qorucîtî qebûl nêkeno koçê Edeneyî keno. Keyeyê 9 kesan de domano 5’ine yo ke serra 1992 de Berwarî de ameyo dinya. Domanîya ê Edene de ravêrte. Bûlûto ke domanîye de eleqedarê futbolî bi, dima ra hunerî dir eleqedar bi. Dimayo ke bi 16 serre cayê xo mîyanê xebata hunermendanê Navenda Çanda Mezopotamya (NÇM) de girewt. Heman wextî de wendişê xo zî domna.

Wendekarê Fakulteya Huqûqî Bi

Bûlût emrê ciwanî de xo aver berd û wexto ke xo seba unîversîte amade kerd, bi tercîhî heqê wendişê Fakulteya Huqûqî ya Unîversîteya Çûkûrova bi dest fîna. Dimayê Qirkerdişî Roboskî yê serra 2011’î çalakîyêka protestoyî de ame tepiştene, 15 serrî cezaya hepsî dîyaye ê. Îtîrazî ser o newe ra ame muhakemekerdene û qerarê veradîyayîşê ê ame dayene. Dima ra zî bi îdîaya “endamîya organîzasyonî” ê rê 7 serrî ceza dîyaye û serra 2015 de ame veradayene.

Birîndar Kerdî û Dima ra Tepiştî

Seba ke embazê êyê zîndanî Seyîthan Dedeyî bi guleyê polîsan cuya xo vînî kerde, Îhsan Bûlût şi Gever ke tewrê serweşîye bibo. Polîsan kesanê ke tewrê serweşîye bîyî ser o zî guleyî varnayî û o linganê xo ra bi giranî birîndar bi. Bi mengan tedawî dîye. Linga êya raste bîye weşe, la linga êya çepe qasê 4 cm bîye kilme. Hewna ke tedawîya Bûlûtî nêqedîyabî, înan o newe ra eşt zîndan.

Xo Xoverdayîşî ra Dûrî Nêgirewt

Dewaya ke bi îdîaya “endamîya organîzasyonî” ci rê ameya akerdene dewam kena. Îhsan Bûlût Zîndanê Kurkçuler ê Edeneyî yê Girewteyî yê Tîpê F’yî ra şirawîya Zîndanê Kirikkale yê Girewteyî yê Tîpê F’yî, dima ra zî şirawîya Zîndanê Wanî yê bi Asayîşê Berzî yê Tîpê F’yî. Xeylî reyan tewrê grevê vêşanîye bi. Grevê vêşanîye yo ke 1’ê Adare ra dest pêkerdibi, 30’ê Nîsane ra nata açarna rojeyê mergî.

Îradeyê Înan rê Hurmet Ramojnena

Keyeyo ke rîyê problemanê madî ra nêeşkeno timî şiro pêvînayîşê lajê xo, her hewte bi rayîrê telefonî ê ra xebere gêno. Pîyê Îhsan Bûlûtî Ahmet Bûlûtî vat, “Xalê Îhsanî Wan de yê. Keyeyê înan awan bo, her pêvînayîşê akerdeyî de ê şinê serdana ê. Teberê kemîkerdişê kîloyî de nika problemê lajê mi çinê. Roja ke înan dest bi grevê vêşanîye kerdo ra nata halê înan ver bi xirabîye şino. Îradeyê înan o. Ez îradeyê înan rê hurmet ramojnena.”

‘Ma Meraq Mekerê’

Ahmet Bûlûtî vat ke lajê ê qiseykerdişê peyênî de bi telefon ê ra vato, “Ma meraq mekerê. Ma xo dayo xoverdayîşî ver. Her rengê xoverdayîşî seba ma şeref o. Wa şarê ma bieşnawo. Eke paştdayîşê şarî çinbo do çalakîya ma bi ser nêkewo.”

‘Heqê Ma zî Estê’

Ahmet Bûlûtî vat vero ke şehadetî virazîyê ganî waştişanê tepişteyan rê cewab bêro dayene û wina veng da pawitoxanê merdimîye û demokrasîyî: “Heqê ma zî estê. Wa merdimî tena rîyê waştişê xo yê heqanê xo ra memirê. Wa çew bêveng memano û merdimê ma cuya xo vînî mekerê. Çîyo ke heqê her kesî yo, çira Kurdan rê qedexe yo? Her keso ke te dir wijdan estbo, do dorê waştişanê Kurdan de bêro têhet.”

Lajêkê Înan zî Mîyanê Refanê Gerîlayan de yo

Ahmet Bûlûtî da zanayene ke lajêk înan zî mîyanê refanê gerîlayan de yo û vat, “Îhsan her ke bi telefon gêreno, ê zî perseno. Seba mucadeleyî ma sey keye xebetîyayî. Çi bedel lazim bi ma da. Cuya azad û seypêye beno ke tewr zaf heqê înan a. Labelê waştişê înan yenê astengkerdene. Ez qerarê Îhsanî û heme domananê xo reyde ya. Mi çi rey înan ra nêvat ‘nê.’ Ewro zî paştî dana qerarê înan.”