Kurdê Rûsya bi çalakîyanê cîyayan Komployê Mîyanneteweyî yê vera Rayberê Şarê Kurdî Abdullah Ocalanî şermezar kerd. Çalakîyan de ame parekerdene ke heta Rayber Apo azad nêbo têkoşînê kurdan do dewam bikero.

Moskova

Paytextê Rûsya Moskova de kurdan bi kombîyayîşêk komplo şermezar kerd û da zanayene ke 15ê Sibate seba kurdan rojêka reş a. Sîyasetmedar Ferman Xerzanî kombîyayîş de qisey kerd û vat: ''Komplo 1999î ra nata dewam keno. Milîtanê Têgêrayîşê Azadîye yê Kurdîstanî yê Apoyî her ca de vera komployî têkoşîn kenê û heta ke no têkoşîn ser bikewo do dewam bikerê.''

Krasnodar

Kurdanê şaristanê Krasnodarî yê Rûsya seba şermezarkerdişê Komployê 15ê Sibate eşkerayîyêke daye.

Endamê Otonomîya Kulturê Kurdan Îşxane Aslan û endamanê Meclîsî Abdurrehman Alîyev û Temir Gasanovî eşkerayîye de qisey kerd. Qiseykerdoxam ard ziwan ke şexê Rayber Apoyî de vera pêro kurdan polîtîka çinkerdişî yena kerdene.

Platnirovskaya

Bajarekê Platnirovskaya yê herêma Krasnodarî de zî kurdan seba şermezarkerdişê Komployê Mîyanneteweyî yê 15ê Sibate eşkerayîyêke daye. Eşkerayîye de Hemserekê Meclîsê Kurdan Tahîr Newroz qisey kerd. Newrozî vat: ''Şarê kurdî heta ke Rayber Apo azad bibo do têkoşîn bikero. Kurdê Rûsya pabesteyê Rayber Apoyî yê û seba azadîya ci her tim do têkoşîn bikerê.''