Anqara de roja verêne ya rojeyê Muharemî de bi hawayêkê hemwextî vera Cemxaneyê Ana Fatma, Cemxaneyê Şahê Merdan, Komeleya Dewa Gokçebali û Weqfa Elewîyanê Bektaşîyan a Terekeme  hêriş ame ame kerdene. Vizêr Amed, Dêrsim û xeylêk bajaranê bînan ê Kurdîstan û Tirkîya de hêrişî ameyî şermezarkerdene.

Amed de verê Komeleya Kulturî yê Pîr Sultan Abdalî (PSAKD) de eşkerayîye ameye dayene. Wekîla HDPyî Meral Daniş Beştaş û îdarekarê HDP, EMEPû ESPyî yê bajarî zî tewrê çalakîye bîyî. Hemserekê PSAKDyî yê Amedî Aydin Atliyî veng da ke wa vera provokasyonan hîsgêr bêro têgêrayene û vat seba ke hêrişkarî bêrê tepiştene têkoşîn bikerê. Merale Daniş Beştaş zî vat: ''Êyê ke komelî verdênê pê do peynî de vînî bikerê. Têna bi destbendkerdişê yew kesî şima nêeşkenê ma bixapînê. No hêriş têna hetê yew provokatorî ra nêame  kerdene. Îqtîdaro ke cemxaneyan sey îbadetxaneyî qebul nêkeno, berpirsîyarê nê hêrişan o.''

Dêrsim de zî serêkşîya Komeleya Elewîyanê Demokratîkan (DAD)  de Kuçeyê Sanatî de eşkerayîye ameye dayene. Eşkerayîya ke bi seyan kesî tewrê ci bîyî de Hemserekê Pêroyî yê DADî Musa  Kuluyî qisey kerd. Kuluyî vat: ''Înanê ke hêrişê cemxane û dezgehanê ma kerd wa bizanê ke nê hêrişî nêeşkenê verê têkoşînê ma yê azadîye û demokrasîyî bigêrê. Ma verê zextan û polîtîkaya şîdetî de milê xo çewt nêkenê. Ma tim vera neheqîye û hêrişan vejîyayî ma do tim sereberz payra bi.''

Cemxaneyê Xozatî de zî bi eşkerayîyêke hêriş ame şermezarkerdene. Eşkerayîye de wina ame vatene: ''Wa no bêro zanayene ke şima heta ewro bi kiştişê gananê ma û hêrişê vera bimbarekanê ma nêeşkayî ma biqedînê û ewro ra tepîya zî şima do meeşkê ma biqedinê.  Ma kerbela ra heta ewro vera neheqîye milê xo çewt nêkerd û bêveng nêmendî. Hêrişê Anqara bi nameyê demokrasî û îdareyê welatî yew ewbo pîl o.''

Reyna Semsûr, Anqara, Îstanbul, Adana de zî hetê dezgehanê elewîyan ra hêriş ame şermezarkerdene û ame vatene ke elewîyan senî ke hetê ewro vera hêrişan çok nêda do ewro ra tepîya zî wayîrê ercanê xo vejîyê û verê zextan de çok medê.