Tepişteyê sîyasîyî 27ê teşrîna peyêne ya 2023yî ra nata seba azadîya Rayberê Şarê Kurdî Abdullah Ocalanî û çareserîya meseleya kurdan grevê vêşanîye de yê.4ê nîsane de safhaya diyîne ya grevî dîyaye destpêkerdene. Çarçewa ney de tepişteyî mehkemeyan boykot kenê û pêvînayîşî nêkenê. Merdimê tepişteyan do seba paştdayîşê tepişteyan verê zîndanan de her roja dişemeyî çalakîya ''veng bidê azadîye'' bikerê.

Îdarekara TUHAD-FEDî Sebahate Bîçer derheqê babete de ANFyî rê qisey kerd.

Sebahate pare kerd ke Rayberê Şarê Kurdî de pêvînayîş nêno kerdene no zî beno sebeb ke krîzî bibê pîlêr. Sebahate vat: ''Federasyonê ma safhaya diyîne ya grevî ra dima bire daye ke her dişeme verê zîndanan de û roja şemeyî zî verê Wezîrîya Edaletî de eşkerayîyan bidê. Îqtîdarê AKP-MHPyî tim hêrişê zîndanan keno la seba ke bi xoverdayîşê tepişteyan nêeşkeno verê xo dano komelî. Nê sebeban ra ganî tecrîd bêro wedaritene. pêro dinya hêzê haştîye yê Birêz Ocalanî vînena. Îqtîdaro ke haştîye ra terseno seba astengkerdişê yewî û hêvîya şarî her çî keno.''

Sebahate ard ziwan ke ganî şar vera tecrîd, polîtîkayanê şertê taybetî, krîzanê sîyasîyan û ekonomîkî xo rêxistin bikero û vat: ''Eke ma wazenê her warê cuye de azad bibê ganî ma bibê vengê tepişteyan. Ganî ma tim vera tecrîdî payan ser de bibê. Sey merdimanê tepişteyan ma haştîye û edaletî wazenê. Ma venga pêro kesan zî danê ke wa beşdarê çalakîyanê ma yê eşkerayîye bibê. Heta ke tecrîd biqedo çalakîyê ma yê azadîye do dewam bikerê.''