Zîndananê Tirkîya û Kurdîstanî de vera tepişteyanê nêweşan zext û îşkence zêdîyeno. Tewr peynî de bi hêrişê vera tepişteyanê cinîyan ê Zîndanê Şakranî binpaykerdişê heqan ê zîndanan reyna kewtî rojdem. Îdarekarê TUAY-DERî yê Wanî Emin Şekero ke tim zîndanna zîyaret keno derheqê binyapkerdişê heqan ê zîndanan de ANFyî rê qisey kerd.

Şekerî bale ante zêdîyayîşê binpaykerdişê heqan ser û nê vatî: ''Zîndanan de hinî nefes nîno girewtene. Caardişê 12 Êlule ra wetêrî est ê. Qet qanûn nîno caardene. Caardişê dewrê îdareyê pêtî ra wetêrî est ê. Heqê resim, saz, spor û pêvînayîşî bi temamî ameyî xespkerdene. Aktîvîteyê sosyalî werte ra ameyî wedaritene.

Heqê tepişteyanê nêweşan zî yenê binpaykerdene. Tirkîya de 1,500 tepişteyê nêweşî est  ê ke 650ê înan nêweşê giran ê. Tepişteyê nêweşî nînê tedawîkerdene. Nêweşxane de bi kelemçe yenê  muayenekerdene. Wezîfedarî ermeyê tepişteyanê extîyaran ra genê bi kaşkerdişî benê ke no îşkence yo.

Tepişteyê ke ganî bêrê tehlîyekrdene, tehlîyeya înan peyde yena eştene. Teberê mehkemeyanê edlîye de zîndanan de mehkemeya bîne ameya ronayene. Bi nameyê 'Heyetê Çimdarî yê Zîndanî' awanîyêk est o û no heyet cezayanê tepişteyan bi hewayêkê keyfî keno derg.Tepişteyê ke 30 serrî zîndan de mendî înan ra persenê sey 'ti poşman bîyî?' perseno û rîyê nê persan ra tehlîyeyî yenê peydeeştene. Edalet û huqûq her kesî rê lazim o. Zîndanan de îşkenceyo sîstematîk est o.

Tepişteyê extîyarî sey Makbule Ozer û Hanife Aslan ganî bêrê veradayene. Nê dayîkî nêeşkenê miqatê xo bê  û tim bi kelemçeyan şinê nêweşxane yenê. Dewaya Hîbulahî ra bi desan kesî seba ke extîyar ê ameyî veradayene la dayîkê ma hema zîndan de yê. Ganî na neheqîye werte ra bêro wedaritene.

Nê zextê zîndanan pêro pabesteyê tecrîdê Îmraliyî yê. Eke berê Îmraliyî bêrê akerdene no kaos qedîyenon û berê haştîye beno a. Eynî wextî de binpaykerdişê heqanê zîndanan zî qedîyeno. Tecrîdê Îmraliyî sûcê merdimîye yo. Tecrîd têna vera Birêz Ocalanî  nîno caardene, no tecrîd heme zîndanan de est o. Ganî polîtîkaya tecrîdî cade biqêdîyo.''