Heyetê Weçînayîşî yê qezaya Îdirî  yê YSKyî muracatê namzedê Şaredarîya Îdirî ya DEM Partî Mehmet Nurî Guneş û namzeda Şaredarîya bajarekê Hoşhaberî Emîne Yondem Kartal red kerd.

Namzedanê DEM Partî dosyayê xo yê namzedîye teslîmê heyetî kerdbî. Guneşo ke verê cû bi îdîaya 'endamîya rêxistine' amebi cezakerdene seba 'agêrayîşê heqan' muracatê mehkeme kerdbi, muracatê ci amebi qebulkerdene û astengîya verê namzedîya ey amebî wedaritene.

Endamê DEM Partî, CHP û Îyî Partî muracatî ser o raye daye ke verê namzedîya Guneşî de astengîyêke çin a. La namzedê AKPyî tewrê kombîyayîşê heyetî nêbi. Di karmendan û heyetê dadgeran zî seba redkerdişê muracatî raye daye.

Ame parekerdene ke muracatê Emîne Yondem Kartal zî seba ke tewra eşkerayîyanê çapemenîye û çalakîyan bîya ameya redkerdene.

Heyetê YSKyî hema zî sebebê bira xo ya redkerdişî eşkera nêkerdî. 

Bire ra dima endamê DEM Partî verê buroyê weçînayîşî yê taxa Sogutluyî de ameyî yewca û înan vera bira YSKyî nêraîbîyayîşê xo mojna. Endamanê partîye dîyar kerd ke AKP qestî ra tewrê kombîyayîşê heyetî nêbîyo û AKPyî tedaya endamanê heyetê weçînayîşî kerdo ke muracatê namzedanê DEM Partî asteng bikero.

Dîya zanayene  ke muracatê namzedanê endamîya Meclîsê Şaredarîye Mehmet Şah, Ahmet Emîn Can, Turan Kaya, Evren Zencî, Yaşar Kalayî zî ameyê redkerdene.

Dima şarî û endamanê DEM Partî taxa Sogutluyî de eşkerayîyêke daye û bira Heyetê Weçînayîşî protesto kerde. Eşkerayîye ra dima girseyî bi slogananê sey ''Îdir do wayîrê îradeyê xo vejîyo'', ''AKP do hesab bido'' û ''Bi xoverdayîşî ma do ser bikewê'' rayraşîyayîş kerd.