Seba Newroza ke do bi slogana “Ma do qetîyen bi ser bikewê, tecrîdî bişiknê” meydanê Bazarî yê Bakirkoyî de do bêro viraştene şar dimayê cigêrayîşî ra bi tîlîlî û çepikan kewt meydan. Hezaran kesî bi slogananê sey “Cinî, cuye, azadî,” “Biciwîyo xoverdayîşê zîndanan” û “Leyla Guvene anorê ma ya,” nuqtayanê cigêrayîşî ra ravêrtî.

Dimayê cigêrayîşanê ke hîrê nuqtayan de ameyî kerdene, destûr nêame dayene ke tu pankart û dowîz bêro berdene bi meydanî. Ciwanêk ke tîşortê xo de fotografê Zulkuf Gezano ke seba protestokerdişê tecrîdê serê Rayberê Şarê Kurdî Abdullah Ocalanî çalakîya fedaîye viraştebî estbi û ser de “Zulkuf gezen ez do tecrîdî bişiknî” nûşte bi dabi xora ame destbendkerdene.

Rixmê astengkerdişan de bi hezaran kesî ver bi meydanî herikênê, bi cil û berganê xo yê cayîyan dîmenê reng-rengênî viraştî, 7 ra heta 70 her serre ra kesî tewrê Newroze bîyî. Tayê hemwelatijî bi beyraqanê destê xo bi vazdayîş kewtî meydan û no bi sebebê virazîyayîşê dîmenanê rengênan.

Platformo ke sehne ser o amebi ronayene pankarta “Newroze pîroz bo” amîbî daliqnayene, meydan bi xeylî beyraqanê zerd, sûr û keskan ame xemilnayene. Bi pirodayîşê def û cenitişê zurnayan deqeyanê ewilênan ra hemwelatijan dest bi govende kerde. Meydanî ra her game slogana “Biciwîyo Serek Apo” bena berz.