Hêzanê Têkoşînê Yewbîyayeyî DBP, ESP, SMF, Partîya Şorişgêre, Alinteri, Partîzan, Platformê Yewîya Têkoşînî ra yeno meydan, vizêr rixmê hende astengî û hêrişan Kadikoy de deklarasyonê xo pêşkêş kerd.

Deklarasyon bînaya Federasyonê Meclîsan ê Sosyalîstan (SMF) ya Kadikoyî de ame wendene. Verî Musa Pîrogluyî qisey kerd û ard ziwan ke ganî kurdî, bindestî, şorişgêr û xoverdayoxî vera faşîzmê dewlete pîya têbigêrê.

Deklarasyon hetê WEkîlanê HDPyî Nurcane Îmîr û Dilşate Cenbaz Kaya ra ame wendene.

Deklarasyon de ame vatene ke Kurdîstan û Tirkîya de hêriş û faşîzmê AKP-MHPyî dewam kenê û vera nînan zî wextêkî ra nata pêro emekdar, karker, şar û ciwanê kurd û tirkî pîya têkoşîn kenê.

Deklarasyon wina dewam keno: ''Cinîyî vera kerdişanê faşîstan vindenê, ciwanê zanîngehan meydanan kenê pirr. Keye, hêga, baxçe û kuçeyan de şar vera têkoşîn û rêxistina xo keno xurtêr. 

Ma sey hêzanê têkoşeran ê Kurdîstan û Tirkîya ganî mesuldarîyanê xo bîyarê ca û çemê hemparî yê têkoşînî de bêrê yewca. Ma do bi şîarê 'Vera faşîzmî yew bibê, rêxistin bibê, têkoşîn pîl bikerê' her ca de têkoşîn berz bikerê. Sere de HDK û HDPyî reyde ma do pêro hêzanê demokratîk û şorişgêran reyde têkoşînêkê hemparî bikerê.''

Dima Hemsereka DBPyî Salîha Aydenîz qisey kerd û da zanayene ke zulmê vera kurdan û Kurdîstanî nika vera tirkan zî yeno kerdene. Aydenîze vat: ''AKP seba ke payan ser o bimano zorbazîye keno. ê nika zî vanê do reform bikerê. Tirkîya zîndanêk a. Senî ke ma vizêr pîya têkoşîn kerd. ma do ewro zî pîya têkoşîn bikerê.''