Amed, Îstanbul û Adana de cezayê ke  Dewaya Kûmpasî ya Koban de dîyayî sîyasetmedaranê kurdan ameyî protestokerdene.

Qezaya Sûrî ya Amedî de Meydanê Şêx Seidî de  bi waştişê semedê herkezî azadîye semedê her kesî demokrasî çalakîye ameye kerdene. Hemsereka Pêroyî ya DBPyî  Çîgdeme Kiliçgun Uçar, Serekê Pêroyî yê TÎPî Erkan Baş, wekîlê DEM Partî û xeylêk temsîlkarê rêxistinanê komelê sîvîlî  tewrê ci bîyî. Verî ver bi Şaredarîya Bajarê Pîlî ya Amedî rayraşîyayîş ame kerdene û dima şar bi sloganan "bijî berxwedana Kobanê" qîra. 

Wekîla DEM Partî ya Mêrdînî Salîha Aydîza ke tîya qisey kerd, vat "Ma qerarê ke Dewaya Kobanê de ameyî girewtene û nas nêkenê. Na ceza huqûqî nîya.  Coka ma zanê ke no qerar hetê îtîfaqî ra ame girewtene. Coka no qerar sîyasî yo. Wa sîstemê nê îqtîdarî bizano ke  ê bi xo çîn benê, ma sey tim reyna payan ser ê. Heta azadbîyayîşê embazanê ma têkoşînê ma do dewam bikero."

Erkan Baş zî xoverdayîş selam kerd û nê vatî:“ Ê do ser mekewê, meeşkê kurdan rê çok bidê dayene û teslîb bîgêrê. Şarê kurdî do çirey verê qesre de milê xo çewt nêkero. No îqtîdar keno ke ma biverdo pê û îqtîdarê xo bikero mehkem. Amed de, Wan de cayê ke merdimî tede azad nîyê qet çew nêeşkeno bibo azad. Ma mecburê ke vengê şarê kurdî bidê eşnawitene. Ganî her kes bizano ke heta ke zerrîya ma yew bo  ma do miheqeq ser bikewê. Ganî ma welatê xo nê dîktatorî ra bixelisnê. ”

Çîgdeme Kiliçgun Uçar zî nê vatî: ” Dewleta ke vana qey bi qerarê Dewaya Kûmpasî ya Kobanê eşkera rayra şiro, tîlîlî, dozîv, ziwan û rayraşîyayîşê şarê kurdî ra tersena. Gama ke ma ameyî nê warî destûr nêdîya çapikanê ma. Wa bitersê.Şarê kurdî do tim îqtîdarî bitersno. Kobanê yew dewa nîya, kûmpas o. Ma do bi têkoşînî heme embazanê xo bikerê azad. Kobanê nêkewt, fahmê DAÎŞî bin kewt. Merkezê têkoşînî yo tewr hole ke dewlete zî zana Zîndanê Îmraliyî yo.  25 serrî yo Birêz Abdullah Ocalan binê tecrîdê giranî de yo. Rixmê heme hêrişan ma haştîye wazenê.  No îqtîdar komelî reyde şer keno û teslîmê mafya bîyo.  îqtîdar wazeno bi şîdetê Kurdîstanî payra bimano.  Qesr bin kewt. Ma vera nê îqtîdarî peyser gamê nêeşte, ma do ser bikewê.” 

Reyna Adana û Îstanbul de zî semedê protestokerdişê qerarê Dewaya Kobanê çalakîyî ameyî kerdene.