Paytextê Fransa Paris de 23ê kanûne de vera Merkezê Kulturê Kurdan ê Ahmet Kayayî hêrişo çekdar ame kerdene û hîrê aktîvîstê kurdî ameyî qetilkerdene. A roje ra nata kurdî û dostê înan kuçeyan de yê.

Kiştox William Mallet bi sûcê 'hêrişê nîjadperestî' tepişîya. Kurdî û xelêk partî û dezgehê komelê sîvîlî vanê no cînayeto edlî nîyo û wazenê ke sey cînayetê sîyasîyî hetê dozgerîya antî-terorî ra wa cipersayîş bêro rayraberdene.

Vizêr paytextê Fransa Paris de verê Wezîrîya Edaletî de çalakîye ameybî kerdene û ewro zî hunerêmendê kurdan verê Wezîrîya Kulturî de ameyî têhet. Hunermendê TEV-ÇANDî yê ke pê enstrumantalanê xo tewrê çalakîye bîyî pankarê Mîr Perwerî akerd. Bi nameyê hunermenda eşkerayîye hetê Deza Amedî ra ameye wendene.

Deza Amedî vist vîrî ke Mîr Perwer seba ke Tirkîya de sey hunermendêkê kurdî raştê zextan ame, welatê xo ra vejîya ame Ewropa û vat: ''Ma seba ke deyîranê xo vanê, yenê qetilkerdene û erzîyenê zîndanan.''

Hunermendan waşt wa Fransa her hetî ra qirkerdişî roşnî bikero û veng da heme şaranê dinya ke wa paştî bidê kurdan.