Qedexeyê PKKyî ke bi qerarê hukmatê Almanî yê federalî yê ê dewrî roja 26ê Teşrîna peyêne 1993 de amebi îlankerdene keweno serra xo ya 25. Qedexeyo ke bibi sebebê tewfîqkerdişê bi seyan kurdan, cezayanê heps û pereyî, hetê dormeyêkê ra sey qerarêk ke demokrasîya Almanan ser o zirarêkê cidîyî dano yeno ercnayene.

Bi nê amacî paytextê ci Berlîn de hewteyê vernîya ma derheqê qedexeyê PKKyî senî zirar dayo şarê kurdî û demokrasîya Almanan konferansêk yeno viraştene. Konferanso ke sernameyê ci „Qedexeyê PKKyî yê 25 serrî – demokrasîya ke 25 serrî yo xizmetê zordarî û sîyasetê teberî yê Almanan de ya“ yo do roja Şemeyî 20ê Teşrîna verêne de saetanê serê sibayî ra heta şand dewam bikero.      

Konferans hetê Komela Azadî ke seva hepsîyanê sîyasîyan ê kurdan mucadele kena, Komela Mîyan-neteweyîye ya Heqanê Merdiman û ya Demokrasî (MAF-DAD), Komela Huqûqnasan ya Demokrasî û Heqanê Merdiman (EJDM/ELDH) û Îdarekarîya Federale ya Roten Hilfe ra bi hawayêkê hemparî yeno organîzekerdene.    

PISPORÎ DO QALÊ ZIRARÊ QEDEXEYÎ BIKERÊ

Konferans de do kesê ke bi serran ê hemverê qedexeyî de mucadele kenê û pisporanê huqûqî biyaro têhet.   

Konferans de do meseleyanê qedexeyê PKKyî û welatanê bînan de û asta Yewîya Ewropa de mucadeleyo ke hemverê nê qedexeyî de yeno dayene ser o bêro vindertene. 

Konferans de do nê kesî qisey bikerê ; pawitox Jan Fermono ke Belçîka de tewrê mehkemaya qerarê „PKK organîzasyonêko terorîst nêyo“ dabi ca girewtibi, pawitoxe Tamara Buruma ke seva Dîwanê Edaletî yê Ewropa qerarê PKK „lîsteya organîzasyonanê terorîstan ya Yewîya Ewropa“ ra bêro vetene xebetêna, Almanya ra zî pawitoxê sîyasetkaranê kurdan ra Lukas Theune, serekê Komela Pawitoxanê Komarpawitoxe, edîtorê WDRyî yo verên Jürgen Hoppe, parlamentera Eyaletê Hamburgî Cansu Ozdemîr, îdarekaranê Komîteya Demokrasî û Heqanê Bingeyênan ra Heiner Busch.    

Konferans do salona banê „Karl-Liebknecht-Haus“ de bêro viraştene.