Huqûqnasê swîsreyîjî Urs Matsingero ke çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de pawitişnameyê Rayberê Şarê Kurdî Abdullah Ocalanî wendê derheqê tecrîdê Îmraliyî, tesîranê pawitişnameyan de ANFyî rê qisey kerd.

Urs Matsinger ard ziwan ke îqtîdarî kesanê ke sey tehlukeyînî vînenê tecrîd kenê û vat: ''Îqtîdar teyna Îmrali de ney mîyanê komelî de tecrîd ferz keno. Tirkîya Îmrali de teyna gardîyanîye kena. Hêzê hegemonîkî yê herêmî û merkezîyî mesuldarê esasî yê. Bêguman Birêz Ocalan sosyalîzmê zanistî rê rayberîye keno.Tecrîd averşîyayîşê nê zanistî zî asteng keno.''

Urs Matsingerî vist vîrî ke Rayberê Şarê Kurdî Abdullah Ocalanî 42 mengî yo tecrîdkerde yo û vat: ''Wexto ke berê Îmraliyî ameyî akerdene hinî tecrîdî dest pêkerd.  Ge ge tecrîd yeno şermezarkerdene. La goreyê mi kurdî hîna zaf ganî wayîrê Rayberê xo vejîyê. Çunke Ocalan seba kurdan şensêk o. Eke destûr bêro dayene ez wazena sey avûkatêkî Îmraliyî zîyaret bikera.''

Mastingerî pare kerd ke Ocalanî hetê zanistanê komeî ra karê cidîyî kerdî û vat: ''Ocalanî sîstemê dinya yo newe lerzna. No binê tecrîdî de kerd. Rojawan  sîstemê kantonê demokratîkî ser o ronîya. Xora no çi bi asanî nêbi. Fikranê Ocalanê tecrîdkerdeyî no şoriş ard ca.''

Mastingerî îfade kerd ke eke dîplomasîya kurdan xurt biba kurdî do bieşkê proesê Lozanî yê diyînî serûbin bikerê. Mastingerî vat: ''Serewedaritişê kurdan ê  bi serkêşîya PKKyî 50 serrî yo dewam keno. Masaya dîplomasîye çin a. Çira? Çunke Rojhelatê Mîyanênî de ganî meseleya kurdan daîmî biba. Birêka winayêne est a. Ganî bire û peymanê neweyî amade bibê. Dîplomatê kurdî çendêk jîhat ê nêzanena. La ganî ê bieşkê lobîyanê xo awan bikerê.''