Seba wedaritişê tecrîdkerdişê Rayberê Şarê Kurdî Abdullah Ocalanî, aktîvîstê Kurdî Cemal Kobanê, Omer Bagdûr, Mele Mûstafa Tûzak û Şîyar Xelîl merkezê NAV-DEM'î yê Berlînî de grevê vêşanîye de yê. Serdayîşê seba çalakgeran dewam kenê.

Tewr peynîye de huqûqnase Heîke Geîsweîde şîye serdana çalakgeran û ard ziwan, ganî her kes xoverdayîşê vera tecrîdî ra wayîr bivejîyo û nê vengî biheşeno. Avûkata Almanije seba serdana çalakgeranê grevê vêşanîye Bochumî ra ameyê Berlîn.

Geîsweîde da zanayene, Tirkîya de bêhuqûqîyêka girde esta û vat, “ Vera na bêhuqûqîye xoverdayîşêko gird esto. Hevalê ke grevê vêşanîye û rojeyê mergî de yê silam kena. Caardişê tecrîdî yê dewleta Tirkî û bêvengîya dewlet û medyaya Ewropa ya vera bêhuqûqîye şermezar kena.”

Tecrîd binpankerdişê beyannameyê heqanê merdimîye yo

Huqûqnasa Almanije Heîke Geîsweîde ard ziwan, tecrîd vera beyannameyê heqanê merdimîye yo û vat, “Sere de  CPT, ê yê ke vera nê binpankerdişî de bêveng ê, yeno dîyayene ke wezîfeyê xo nîyanê ca.”

Geîsweîde vat, sere de hukmatê Almanî yo fedaral ganî Yewîya Ewropa û rayapêroyî yê mîyanneteweyî no xoverdayîşo ke vera na bêhuqûqîya Tirkîya yeno kerdene bigêrê rojdemê xo û da zanayene, “Bi nameyê merdiman ganî ma vera merdişî bivejîyê. Goreyo ke ma vînena rewşe nika xeylî giran a, hêvî kena ke wexêko kilm de tecrîd yeno wedaritene.”

Cemal Kobanê, Omer Bagdûr, Mele Mûstafa Tûzak û Şîyar Xelîl ê ke rewşa înan a weşîye giran bîya, bi qerardarîye çalakîya xo dewam kenê. Tûzak 125 rojî, Xelîl 112 rojî, Kobanê û Bagdûr zî 109 rojî yo grevê vêşanîye de yê.