Vîrusê Korona (Covid-19) hêle bi hêle vila beno. Selahîyetdaranê dewleta tirke hûmara raştikêne eşkera nêkerdbi zî yeno vatene ke bi seyan kesî vîusî ra nêweşxaneyan de yê. Eşkerayîya fermîye ya şanê sêşemeyî de amebi parekerdene ke kesêk vîrusê Korona ra merd.

Îran zî welatanê ke vîrusê Korona tira zaf tesîr kerd ra yew o. Îran bi şertê kontrolê edlîyî bi des hezaran tepişteyî û hukmwerdeyî bi hawayêkê demkî verdayî.

Tirkîya de hukmatî hema zî gamêka winasêne nêeşte. Rayaumûmîye û huqûqnasî hîşyar kenê ke eke vîrus bireso zîndanan felaketêko pîl do bivejîyo werte û wazenê tepişteyî 3u hukmwerdeyî bi şertê kontrolê edlîyî bêrê veradayene.

Huqûqnas Feyzî Çelîkî na babete de bale ante bira Rêxistina Weşîye ya Dinya ser. Çelîkî ard ziwan ke goreyê bire pêro karê hukmkerdişî ameyî vindertene û vat: ''Rêxistina Weşîye ya Dinya pare kerd ke no pandemî yo. Yanî na nêweşîye asta globale de vila bena. Derzin û dermanê vera naye hema zî nêameyî peydakerdene. Zîndanan de rîsk pîl o. Tepişteyî eşkenê biwazê ke bi kontrolê edlîyî bêrê veradayene.Hukmwerdeyî zî eşkenê biwazê ke cezaya înan bêra taloqkerdene. Goreyê madeya Qanûnê Bingeyî ya 56/1 Heqê her kesî esto ke cayêk de bi weşîyêka başe biciwîyo. Dewlete nêçare ya ke na babete de firsendanê hewcedaran biviraza. Na çarçewe de ganî bi hawayêkê lezî tepişteyî û hukmwerdeyî bêrê veradayene.‘‘

Huqûqnas Cemîl Demîrî zî vist vîrî ke nê serranê peyênan de hûmara tepişteyan bîye zêdêr û kapasîteya zîndanan qîm nêkena. Demîrî vat: ''Cuya tepişteyan rê gef yeno wendene. Heta nika seba meseleyê tepişteyan ê nêweşan nêameyî çareserkerdene. Ganî bi hawayêkê lezî çareserî bêra peydakerdene. Çareserîya verêne zî na ya ke ganî bi efûyêka pêroyîye caardişê cezayan bêro taloqkerdene. Ganî tepişteyî cade bêrê veradayene.''