Parlamentera Partîya Çepî ya Almanya Ulla Jelpke qerarê îdareyê Washîngtonî yê vera serekanê Têgêrayîşê Azadîye yê Kurdîstanî rexnê kerd û va: ‘‘Amerîka wazena ke şerê mabênê PKKyî û Tirkîya xorî bikero‘‘
Parlamentera Partîya Çepî ya Almanya Ulla Jelpke qerarê Amerîka rexne kerd û vat ke Amerîka bi nê qerarî eşkera ramot ke ê kîşta Tirkîya de ca gênî.
Hewteyo ravêrte de Amerîka qerarê tepiştişê hemserekê Konseya Rayberdişî yê KCKyî Cemîl Bayik, endamê Komîteya Rayberdişî yê PKKyî Duran Kalkan û Murat Karayilanî girewtbi. Vera nê qerarî çar hetanê dinya ra reaksîyonî dewam kenî.
Parlamentera Partîya Çepî ya Almanya Ulla Jelpke derheqê qerarê Amerîka de ANFyî rê qisey kerd.
Jelpke vist vîrî ke Amerîka waxtê demê aşitî de waşt ke PKKyî û Tirkîya werê bîyaro û va: ‘‘ Nika zî sey rojawano wehşî sereyê rayberanê Têgêrayîşê Azadîye yê Kurdan rê xelat ronaya û derheqê înan de qerarê tepiştişî veto. No waştişê xorîkerdişê şerê Kurdîstanî yo.‘‘
Jelpke bale ante dirîyîya Amerîka ser û va: ‘‘Bi nê qerarî aseno ke Sûrîye de îtîfaqê Amerîka yê YPGyî taktîkî yo. Ma dî ke Amerîka dostê kurdan û şaranê bindestan nîya. Îqtîdarê Amerîka îqtîdarêko bêrehmet û egoîst o.‘‘
