Vervatoxa karê zereyî yê Partîya Çepî ya muxalife ke Meclîsê Federalî de grûba ci esta Ulla Jelpke, derheqê DAÎŞîyanê ke destê YPGyî de yê veng da hukmatê federalî ke binê serekîya Angela Merkele de yo. Jelpkeya ke ajansê firansizî AFPyî rê qisey kerd vat: „Ganî muhakemekerdişê Daîşîyanê hemwelatîyanê Almanan hetê Almanya ra bêro kerdene.“

Jelpke ard ziwan ke mîyanê şertanê şerrî yê vakurê Sûrîye de dormeyo ke nê DAÎŞîyî bêrê muhakemekerdene hewna çinyo.

Dewamê qiseykerdişê xo de vat: „Halê Almanya ‚welato ke şirawitoxê elemanan o‘ û nê sûcdarê şerrî destê hêzanê kurdan de benê problemêk. Ganî Almanya nê problemî nêdîyayîşîye ra mero.“

Sîyasetkara Partîya Çepî waşt ke Almanya seva apey ardişê DAÎŞîyan bikewo dewre û heta nika na mesela de gamêka cidîye nêerzîyaya.

Goreyê hayîdarîyanê Jelpke ra destê YPG/YPJyî de 33 almanî estê, nînan ra 8ê ci camêrd, 10ê ci cinî û 15ê ci doman ê.