Wekîlê Partîya Demokratîke ya Şaran (HDP) yê Sêrtî yo verên Prof. Dr. Kadrî Yildirimo ke netîceya gonîbîyayîşê mezgî de vizêr şan dinyaya xo bedilnaye Goristanê Yenîkoyî  yê  Baglarê Amedî de ame definkerdene.

Semedê Yildirimî merasîmêk ame organîzerkerdene. Merdimê Yildirimî, Hemserekê KCDyî Berdan Ozturk, Hemserekê DBPyî Salîha Aydenîz û Kesîn Bayindir, Wekîlê HDPyî Dersime Dag, Remzîye Tosun, Mahmut Togrul, Îmam Taşçier, Nejdet Îpekyuz bi seyan kesê ke mîyanê înan de nuştox û ziwannasî estbî tewrê merasîmî bîyî.

Bado ke camîya goristanî de nimajê cenaza ame kerdene heskerdoxanê Yildirimî cenazaya ey ermeyanê xo ser o kirişt û berde wesayîtê cenaza. Bi seyan kesî verbi goristanî rayra şîyî.

Beyraqa Kurdîstanî ke ancîyaye tabutî verê karê definkerdişî hetê polîsan ra ame watene ke bêro girewtene. Heskerdoxê Yildirimî vera polîsan vejîyayî û nêrazîbîyayîş ramojna. Mabênê şar û polîsan de arbede vejîya la destûr nêdîya ke ê beyraqe bîgîrê.

Cenazaya Kadrî Yildirimî pê dûayan ameye definkerdene. Badê definkerdişî sîyasetmedar, nuştox û şarî merdimanê Yildirimî rê serweşîye waşte.