HEDEFÊ KAMPANYA 10 HEZARÎ EURO

Kampanyaya ke sîteya înternetî ya „gofundme.com“ de amîya destpêkerdene hedefo ewilên pêserdayîşê 10 hezarî Euro yo. Mîyanê çend rojan de 2 hezarî Euro ame pêserdayene. Hayîdarîya kampanya de ame vatene:

 „Keyeyê Ahmedî nêeşkeno mesrefanê prosedurê huqûqîyî bido,seva ke keye bieşko hemeyê dosya bivîno ganî dewa akero.“

Mîyanê vengdayoxanê kampanya de nê sazîyî estê; „ISD-Bund e.V.”, “Antirassistisches Bündnis Tribunal NSU-Komplex auflösen”, “Ron Manheim und Thomas Ruffmann vom Haus der Begegnung - Beth HaMifgash e.V. in Kleve” û “Initiative in Gedenken an Oury Jalloh”.

ÎDAREKARÎYA ZINDANÎ GOŞ NÊDAYO VENGDAYÎŞÊ HETKARÎYE

Aşma Temmuze ya vîyaretî de polîsê Ren Vestfalya yê Vakurî (NRW) bi waştişê polîsê Hamburgî Amed Ahmed girewt nezaret. Ahmedî îfadeyanê xo de ard ziwan ke o nêşîyo Hamburg û sûcdarîyanê ke polîsî derheqê ê de kenê raşt nêyê. 

Ahmedo ke di serrî sey multecî mend ne polîsî rê, ne dozgerî û ne zî îdarekarîya zindanî rê nêeşka derdê xo qal bikero. Ta ke şandê 17ê Êlule de hucraya ci de şewat virazîya û bi giranî birîndar bi.

Tehqîqatî dima ra fam bi ke keso ke bi sûcdarîya dizdîro ci yeno gêrayene Amedy Guirayo Malîyij o. Ahmedî 5ê Teşrîna verêne de nêweşxaneyo ke tede tedawî dîyêne cuya xo vindî kerde.

Pîyê Amedî Zahîr Ahmedî yo ke ANFyî rê qisey kerdibi vatibi: „Ma fam nêkenê polîsî xeletîyêka winayêne senî kerda. Ez bawer kena ke lajê mi bi sebebanê sîyasîyan bi hawayêkê kêfî ame tepiştene.“