Endamê Konseya Rayberdişî ya KCKyî Mustafa Karasuyî derheqê tecrîdê Îmraliyî, serrgêra ronîyayîşê PKKyî û Rayraşîyayîşê Gemlîkî de Medya Haber TVyî rê qisey kerd.

Qiseykerdişê Karasuyî ra tay noqtayê girîngî wina yê:

''Vera Rayber Apoyî tecrîdêko giran yeno kerdene. A raşte tecrîd şexsê Rayber Apoyî de vera kurdan û hêzanê demokrasîyî yeno kerdene. Îqtîdarê AKP-MHPyî her ke tecrîd keno giranêr hêrişanê vera kurdan zî zêdîneno. Xora vera tecrîdî têkoşînêko zixm zî yeno kerdene. Rayber Apo bi xo 25 serrî yo vera tecrîdê Îmraliyî xo ver dano. Ewro pêro dinya wayîra nê xoverdayîşî vejîyena. Tewr peyên dostanê ma Hemleya 'Rayber Apoyî rê Azadîye, Meseleya Kurdan rê Çareserîye' daye destpêkerdene.

Asta têkoşînê seba azadîya Rayber Apoyî hende berz bîya ke hînî mumkîn nîya de Rayber Apo mîyanê dêsan de bitepişîyo. No têkoşîn hînî vurîyayo bîyo têkoşînêkê îdeolojîkî. Dormeyê Rayber Apoyî de cinî, ciwanî, şarî û hêzê demokrasî-şorişgêrî yew benê. Çunke paradîgmaya Rayber Apoyî teyna kurdan rê ney pêro şaran rê felate pêşkêş kena.

Rayraşîyayîşê Gemlîkî zaf girîng o. No rayraşîyayîş wayîrê Rayberîye vejîyeno, vera tecrîdî yeno manaya têkoşînî. Şarê kurdî wayîrê Rayberê xo vejîyeno. Xora yew şaro ke nêeşkeno wayîrê Rayberê xo vejîyo çin beno. La ganî şar û hêzê demokrasîyî yê Tirkîya zî wayîrê Rayber Apoyî vejîyê.  Heta ke girîngîya Rayber Apoyî nêra famkerdene demokrasî do nêro Tirkîya. Heta ke raştîya kurdan nêra famkerdene têkoşînê demokrasîyî bi raştî nêro kerdene. Coka Rayraşîyayîşê Gemlîkî ganî vera kolonyalîzm, faşîzm û qirkerdişî zî bêro kerdene û hêzê demokrasîyî yê Tirkîya zî binê parçeyê ci. Wa astengîyî bêrê şiknayene. Ma pê bawer ê ke şarê kurdî, cinî û ciwanê kurdî û dostê kurdan bi xurtî wayîrê nê rayraşîyayîşî vejîyê. 

Serrgêra ronîyayîşê PKKyî yanî 27ê teşrîna peyêne beno nêzdî. Partîya ma PKK xêrê keda Rayber Apoyî ra 45 serrî yo têkoşînê xo rê dewam keno. Rayber Apoyî vera qirkerdişê kurdan no têkoşîno bêhempa da destpêkerdene. Nê 45 serran de bi fikran û paradîgmaya Rayber Apoyî PKK her ke şîyo bîyo pîlêr.  PKK sey partî û rêxistinanê bînan vila nêbi û çin nêbi. Çunke mabênê PKKyî û Rayber Apoyî de têkilîyêka xurte est a. PKKyî ronîyayîşê xo ra nata bi nasnameyê Rayberîye şeklê xo girewt. Bi nê hawayî Rayber Apoyî xo resna şarî û pêro dinya.

Dewleta tirke ya îşxalkere Herêmanê Pawitişî yê MEdya de rixmê teknîk, teknolojî, çekanê qedexeyan û bombayanê nukleran zî nêeşkena netîceyêke bigêra. Gerîlayê ma bi terzê şerê tunelan û erazî nêverdenê ke dişmen nefes bigêro. Dewleta tirke 3 serrî yo bêmabên vera ma çek û bombayanê kîmyewîyan şuxilnena. La çew verê ney de vengê xo nêkeno. Serhed de zî xoverdayîşêko pîl est o. PDK Herêmanê Pawitişî yê Medya de ardimê dewleta tirke keno. Ma çend reyî PDK hişyar kerd la goş nêkuweno ma. 

Her  çiqas ma kerdişanê Hamasî raşt nêvînê zî ma hetê şarê Filîstînî de yê. Îsraîl sey dewleta tirke qirkerdişî keno. Erdogan û dewleta tirke qaşo hetê Filîstînî de yê la hetê bînî de kurdan kişenê. Filîstîn xemê Erdoganî de nîyo. Erdogan teyna peyê menfaetanê xo de yo. 

Mehkemeya Qanûnê Bingeyîyî (MQB) seba wekîlê TÎPî Can Atalayî birêke daye. La bire nêna caardene. Heta Mehkemeya Berze ya Temyîzî gerreyê MQByî kerd û îqtîdarî zî destek da ci. Nê tersenê ke kurdî zî dima do na bire ra îstîfade bikerê. La hêzê demokrasîyî yê Tirkîya ney nêvînenê. Kamî biwazê têkoşînê demokrasîyî bikerê ganî hêverî hetê kurdan û têkoşînê kurdan de cabigêrê.''