Şîrketa Vilakerdişê Ceyranî ya Dîcle (DEDAŞ) 6 şaristanan de karkerê xo bi hawayêkê keyfî karî ra vetbî. Nînan ra tayênî Amed de grevî kenê. Karkerî verê DEDAŞî de bi rojan o çalakîye kenê. 

Hemserekê Şubeyê Amedî yê Genel-Îşî yê DÎSKî Becet Barutî derheqê xoverdayîşê karkeran de ANFyî rê qisey kerd. 

Barutî da zanayene ke karkerî nêeşkenê DEDAŞî ra heqê keda xo bigêrê coka ê hetê karkeran de yê. Barutî vat: ''Karkerî bi serran o wazenê ke heqanê xo yê şexsî û sendîkabîyayîşî bişuxilnê. Nê binê sînorê vêşanîye de meaşî gênê coka grev de yê. Ma venga hukmatî danê ke vera na neheqîye têbigêro û mudaxele bikero. Ma soz danê ke hetê xoverdayîşê embazanê xo de bê û heta ke çalakîya înan ser bikewa tîya ra nêşorê.''

Karkeran ra Azad Kayayî îfade kerd ke ê bi hawayêkê neheqî karî ra ameyê vetene û vat: ''Ganî keda ma çin nêhesîbîye. Ma wazenê sendîka de cabigêrê û meaşê qîmî bigêrê. Bi Kod-49î ma karî ra ameyî vetene. Tay embazê ma nê karî de ceyranî ra birîndar bîyê, tayênî zî merdê. Ma na bêhuqûqîye qebul nêkenê. Ma do têkoşînê xo rê dewam bikerê.''

Mazlûm Barişo ke Şirnexî ra tewrê xoverdayîşî bîyo, heta ke waştişê înan nêrê caardene çalakîye do dewam bikera. Barişî vat: ''21ê temmuze de ez bê sebebî karî ra ameya vetene. Ma do heta peynî nê têkoşînê heqdarî rê dewam bikerê.Eşkera yo ke hukmat paştî dano DEDAŞî. Karkeran ra nêbo berardiş nêbeno coka komel zî nêbeno. Ma hêvî kenê ke na şaşîtîye do biqeda.''