Polîtîkaya qirkerdişî, înkarî û îşxalî ya rejîmê AKP-MHPyî ya ke vera kurdan yena kerdene tesîrêko giran keno ekonomî ser. Wekîlê HDPyî yê Îstanbulî û Profesorê Ekonomîyî Erol Katirciogluyî polîtîkaya ekonomî yê partîya xo, meseleya nasnameyî û sinife ya komelî ANFyî reyde ercnayî.

Katirciogluyî vat: ''AKP nêwazeno xo sîyasetî ra tepîya bigêro çunke yew malîyetê ney esto. Malîyetê ci zî îqtîdarê kewtiş o. Mabênê Tirkîya û Sûrîye de hewceyê haştîye esto. Eke AKP verê xo bido haştîye beno ke xo malîyetê kewtişê îqtîdarî ra xelisneno. Goreyê mi ê zî nêwazenê haştîye bîyarê ca. Coka haştîye û demokrasî AKPyî ra nênê.Weçînitoxê ma hem xizan ê hem zî meseleya înan a nasnameyî esta. Coka ganî ma têna sey partîyêka sîyasîye tênêgêrê û seba ekonomîyî zî tay polîtîkayan bikerê. Dewlete pereyanê zêdeyan erşawena herêmanê kurdan la no pere seba bingeyê înan yeno xebitnene. Coka Kurdîstan de xizanîyêka pîle esta. Beno ke ma nêeşkenî xizanî û bêkarî bi temamî werte ra wedarê la ma eşkenê tesîrê ci tayêr bikerê.

HDP partîya her kesî yo ke semedê nasnameyê xo benê hedef. Tirkîya de vera nasnameyan hêrişî estê. Ma waştişanê pêro bindesteyan binê nameyê partîya xo de berz kenê.Nê dewirî de Tirkîya de meseleya sinife peyê meseleya nasnameyî de mende. Ez meseleya sinife bi temamî wetêr nêkena. La nika Tirkîya de meseleya nasnameyî hîna zêde vernî de ya. Eke ma rojêke bibê komelêko ke kurdî pê ziwanê xo ciwîyenê, demokrasî tede serdest o, waştişê nasnameyî ameyî caardene o wext ma eşkenê meseleya sinife ser o qisey bikerê. La goreyê mi nika meseleya nasnameyî meseleya sinife ra hîna giranêr a.''