Tarîxnas û teorîsyenê yunanî George Katsiaficasî derheqê hêrişanê kîmyewîyan ê Erdoganî de ANFyî rê qisey kerd û da zanayene ke ganî Erdogan mehkemeyêka mîyanneteweyîye de bêra muhakemekerdene.

Tarîxnas û teorîsyenê yunanî George Katsiaficasî rexne kerd ke Tirkîya pê çekanê kîmyewîyan hêrişê kurdan kena û wexto ke Lahey de dewa ameye akerdene Erdogan do hînî bi rehetî têmegêro. George Katsiaficasî vist vîrî ke OPCW zî rixmê hende delîlan vera hêrişanê kîmyewîyan ê Tirkîya qebul nêkeno.

George Katsiaficasî vat: ''Medyaya mîyanneteweyîye bi hîsgerî nêzdîyê şerê Rûsya yê vera Ukrayna bena la babeta kurdan de xo kena kor û lal. Ganî warê mîyanneteweyîyî de seba kurdan kampanyayêke bêra kerdene. Qirkerdişê Helebçe 1988 de ame kerdene la komelê mîyanneteweyîyî 2006 de ancax vera ney nêrazîbîyayîşê xo mojna. Kurdê ke zanenê paştî nêdîyena înan, hînî pê hêzêkê teberî bawer nêkenê. Ganî verê OPCWyî de çalakîyê ke kurdî kenê, do dewam bikerê. Ganî komê mîyanneteweyî paştî bidê nê çalakîyan.''

George Katsiaficasî bale ante gefanê Erdoganî yê vera Rojawanê Kurdîstanî ser û vat: ''Erdogan wazeno pêro waranê ke tede kurdê azadî ciwîyenê çin bikero. Erdogan ganî sûcanê xo yê şerî ra mehkemeya ceza ya mîyanneteweyîye de bêro muhakemekerdene û tepiştene.''

George Katsiaficasî tewr peynî de vat: ''Ma do pîya ser bikewê.''