Sîyasetmedar Fuat Kav ke Zîndanê Dîyarbekîrî de mend ANFyî rê qalê manîfestoyê xoverdayîşî yê şorişgêranê PKKyî yê vera konseptê îmha kerd. 

Qismê diyînî yê qiseykerdişê Kavî ra tay noqtayê girîngî wina yê:

''Mehmet Hayrî Durmuşî mehkeme de îtîrafkerîye red kerde û vat 'Embazê ma Mazlûm Doganî xo feda kerd. Çaran xo vêşna. Naye ra pey ez do bikewa rojeyê mergî.' Heyetê mehkeme fam kerd ke çalakîya Mazlûm Doganî û yê Çaran ra dima gama hîrêyîne çalakîya Hayrî Durmuşan do biba. Mehkeme kerd ke embaz Hayrî çalakîya xo ra abigêro. La embaz Hayrîyî çalakîya xo ra fek vera nêda. Ey ra pey embaz Alî Çîçek, Kemal Pîr, Akîf Yilmazî û çend embazanê bînan dest pê çalakîya rojeyê mergî kerd. Înan waşt ke tedayê vera pawitişê sîyasîyî wedarîyê, îşkence biqedo, îtîrafkerîye nêra ferzkerdene û şert û mercê zîndanî raşt bibê.

Hûmara çalakîkeranê rojeyê mergî resabî 50-60 kesan. Çalakîkerê rojeyê mergî Zîndanê Amedî de erzîyayî hucreyanê yewkesî. Gardîyanan zî seba ke ma aciz bibê deyîrî vatêne, nêng çînayêne.

Embaz Kemal Pîr roja 57ine de şehîd bi. Embaz Hayrî roja 64ine de şehîd bi. Embaz Akîf roja 65ine de û embaz Alî roja 66ine de şehîd bîyî. Nê pêro nêweşxaneyan de şehîd bîyî. Şehadetê embazanê ma ra dima tayînê Esat Oktayî vejîya cayêkê bînî. Çunke Kemal Yamak û sererkan dî ke rojeyê mergî cidî yo. Embazê ke rojeyê mergî de bîyî heman cayî de bîyî. Ma hucreyê koxûşê 36inî de bîyî. Teberî ra vengê îşkenceyî ameyêne ma.

Seba ke prosesê barbarîye nêqedîya ma 1ê êlula 1983yî de dest pê prosesêkê neweyî yê rojeyê mergî kerd û 27 rojan ci rê dewam kerd. 

Zîndanê Amedî heman wextî de tarîxê PKKyî yo. PKK teyna têkoşînê gerîlayan ra îbaret nîyo. PKK têkoşînê îdeolojî û polîtîkî zî keno. Çalakîya embaz Mazlûmî, çalakîyan Çaran û çalakîya 14ê Temmuze tena vera kerdişanê Zîndanê Amedî nêbîyî. Nê çalakîyî heman wextî de pawitişê PKKyî bi. Pawitişê PKKyî zîndanan de ame kerdene. Xoverdayoxanê Zîndanê Amedî venga Rayberîye, PKK û kadroyan kerdêne û vatêne 'Ma tîya de yê, ma zîndan de tepişte yê la ma xo ver danê. Teslîmîyet û îxanet ma de çin ê.'

Zîndanê Amedî de manîfestoyêkê xoverdayîşî ame afernayene. No manîfestoyê xoverdayîşî yo ke hetê Mazlûm Dogan, Çaran û Xoverdayoxanê 14ê Temmuze ra ameyo afernayene vurîyayo manîfestoyêkê pêro zîndanan. Eke ewro zîndanan de bi des hezaran kesî payan ser de yê û xo ver danê, xo xêrê manîfestoyê Zîndanê Amedî ra yo.''