Hemserekîya Konseya Rayberdişî ya KCKyî bi wesîleya 1ê Gulane Roşanê Karker û Kedkaran ê Dinya mesajêk weşana. Eşkerayîye wina ya:

‘’1ê Gulane Roja Yewîye, Paştdayîş û Têkoşînî sere de karker û kedkaran pêro bindestan, şaran û her kesî rê fîraz bo. Ma şehîdanê 1ê Gulane zî bi hûrmet û minetî yad kenê.

Vera modernîteya kapîtalîste têkoşînê kede wayîrê cayêkê girîngî yo. Têkoşînê sosyalîzmî ewro resayo astêka globale û vera modernîteya kapîtalîste bîyo têkoşînêko winayên ke têkoşerê têdûştîye, demokrasî û azadîye wayîrê ci vejîyenê. Sosyalîzm û têkoşîno sosyalîst vera serdestîya camêrdan, kolonyalîzm û modernîteya kapîtalîste nîşanê cuyêke yo û seba merdimatîye girîng o. 

Caardişê erjanê cewherê sosyalîzmî, cewherê têkoşînê ma yo. Rayber Apoyî sosyalîzm de israr sey merdimatîye de israr pênase kerd û bi nê hawayî raştîye eşkera kerde. Têkoşînê Azadîye yê Kurdîstanî bingeyê nê erjan de aver şi û şino. Rayber Apoyî bi Vengdayîşê ‘Haştîye û Komelê Demokratîkî’ no tewir ancî mojna. Xora Komelo Demokratîk hetê tarîxî ra yeno manaya caardişê têkoşînê kedkaran û bindestan, cinîyan û şaran. Coka xîretê famkerdişê vengdayîşê Rayber Apoyî zaf girîng o. Sey têgêrayîşî ma îfade kenê ke tewirê ma wina yo û ma goreyê ney mîyanê vurîyayîş û vurnayîşî de yê.

Ma ancî 1ê Gulane fîraz kenê. Ma veng da ke yewîye û paştdayîşî aver berê. Ma veng danê ke nê esasî ser o têkoşînî berz bikerê. Ma venga şarê xo yê welatperwerî danê ke bingeyê ‘Haştîye û Komelê Demokratîkî’ de karker, kedkar, cinî û bindestan reyde wayîrê 1ê Gulane vejîyo û fîraz bikero. Têkoşînê nê bingeyî do dinyaya kolonyalîste ya modernîteya kapîtalîste birijno, dinya kolonyalîzmî ra bixelisno û cuyêka azadîgîra cinîyan, demokratîk û ekolojîke awan bikero.

Bijî 1ê Gulanê"