Hemserekîya Konseya Rayberdişî ya KCKyî bi wesîleya serrgêra 7. ya Qirkerdişê Pirsûsî eşkerayîyêke daye. Eşkerayîye wina ya:

''Ma şexsê 33 endamanê Têgêrayîşê Ciwananê Sosyalîst û Şorişgêran ê Tirkîya de ke 20ê temmuza 2015î de hêrişê îqtîdarê faşîstî yê AKP-MHPyî de şehîd bîyê, pêro şehîdanê şoriş û demokrasî bi rêzdarî û minetî yad kenê. Ma reyna soz danê ke têkoşînê înan bi serkewtişî tacîdar bikerê. Şehîdê Pirsûsî temsîlê paştdayîş û têkoşînê bi hemparîya têgêrayîşê kurdan ê. Ma do têkoşînê şehîdanê Pirsûsî hîna pîl bikerê û vîrameyîşanê înan bidê ciwîyayene.

Endamê Têgêrayîşê Ciwananê Sosyalîst û Şorişgêran ê Tirkîya seba paştdayîş û awankerdişê Kobanê ameyî Pirsûsî. Înan waştêne bi fikranê şorişgêr, paştî bidê şarê kurdî û seba ney ameyî Pirsûsî. La îqtîdarê AKP-MHPyî yê faşîstî bi hîsanê qesasê Kobanê sey DAÎŞî qirkerdişêko pîl kerd. Faşîzmê AKP-MHPyî seba ke qesasê Kobanê bigêro amadekarîya Qirkerdişê Pirsûsî kerde û ard ca. AKP-MHPyî waştêne ke bi destê DAÎŞî Kobanê bin bivisno û dewletêka newîye binê serdestîya cerganê faşîst-dîndaran de awan bikero. La binkewtişê DAÎŞî no plan bin kerd. AKP-MHP hêrs bi û waşt ke qesasê DAÎŞî paştgîranê kurdan ra bigêro.

Qirkerdişê Pirsûsî reyde faşîzmê AKP-MHPyî dest pê şerê qirkerdişê kurdan kerd. 7ê hezîrane de peynîya AKP-MHPyî ameye û gamê girîngî seba Trikîyaya newîye ameyî eştene. Bi qedîyayîşê nê îqtîdarî verê çareserkerdişê meseleya kurdan abi. La AKP-MHPyî dezgehanê xorinan ê dewlete reyde seba astengkerdişê çareserîya demokratîke ya meseleya kurdan, demokratîkbîyayîşê Tirkîya, dewamkerdişê sîstemê xo yê kolonyalîstî îtîfaqo neteweperwer, nijadperest awan kerd û bi Qirkerdişê Pirsûsî dest pê nê prosesî kerd. Bi nê hawayî şerê çinkerdişî yê AKP-MHPyî yê vera kurdan 24ê temmuza 2015î de bi Qirkerdişê Pirsûsî dest pêkerd.

7ê hezîrane de bi serkewtişê HDPyî binkewtişê îqtîdarê AKP-MHPyî newe ra vejîya werte. La Erdıganî neyarê kurdan Bahçelî û hêzanê xorinan ê dewlete de serê qirkerdişê kurdan îtîfaq kerd û Tirkîya de sîstemê faşîzmî awab kerd. AKP-MHPyî çarçewa Planê Çokdayîşî de vera kurdan û hêzanê sosyalîst-çepgîran ê Trikîya qirkerdişî û şerêko pîl da destpêkerdene. Qirkerdişê Pirsûsî ra dima 24ê temmuze de prosesê qirkerdiş û tasfîyeya gerîlayan dest pêkerd. Înan Tirkîya û Vakurê Kurdîstanî vistî torra faşîzmî û no proses hema zî dewam keno. Rixmê hende hêriş û qirkerdişan zî ê nêşkayî binkewtişê xo yê Kobanê mîyan bikerê û ver bi binkewtişî şîyî.

Qirkerdişê Pirsûsî bi pêkerdişê Erdogan û Bahçelîyî hetê îtîfaqê AKP-MHPyî ra ame kerdene. Seba ke nê ciwanan paştî dayêne pawitişê Kobanê bîyî hedefê nê îtîfaqî. Ciwanê Qirkerdişê Pirsûsî serê rêçê Denîz Gezmîş, Mahîr Çayan, Îbrahîm Kaypakkaya û Hîkmeta Kivilciman de şîyêne. Rayber Apoyî û PKKyî tim girîngîye dayêne têkoşînê hemparî yê şarê kurdî û tirkî û rêxistinbîyayîşê şorişê Tirkîya yê bi şorişê Kurdîstanî. Xoverdayîşê Kobanê de Têgêrayîşê Sosyalîst û Şorişgêrî yê Tirkîya no mojna. Şehîdê Pirsûsî sembolê wayûbiratîyê şaran, milîtanê şorişgêrê serkêşî û fedayîyê stratejîya têkoşînê hemparî yê. Ê hemrayê Denîz, Mahîr, Îbrahîm, Hakî, Kemal, Mazlûm û Rayber Apoyî yê.

Mesuldarîya ciwanan na ya ke têkoşînê şehîdanê Pirsûsî aver berê. Wayûbiratîya şaran, averşîyayîşê têkoşînê hemparî yê şorişê Kurdîstan û şorişê Tirkîya ancax bi serkêşîya ciwanan beno. PKKyî zî sey parçeyêkê Têgêrayîşê Ciwananê Sosyalîst û Şorişgêran ê Tirkîya vejîya rayîr û bi nê ruhî têkoşîn kerd. Rayber Apoyî bi vateyê 'Ma bi ciwanan dest pêkerd û ma do bi ciwanan ser bikewê' ruh û kesayetê Şorişê Kurdîstanî eşkera kerd. Ganî ciwanî bi nê ruh û nasnameyê şorişgêrî xo her ca de rêxistin bikerê û têkoşînî pîl bikerê.

Ganî her ca de ciwanî serkêşîya perwerde û rêxistinîye bikerê. Girîng o ke ciwanî wurzê payan ser û serkêşîya şorişî bikerê. Sey vizêrî ewro zî ganî ciwanê zanîngehî yê Tirkîya û Kurdîstanî wayîrê nê mesuldarîyanê komelkî û tarîxîyan vejîyê, girseyan bi rêxistinkerdişî bivisnê mîyanê têgêrayîşî û serkêşîya komelî bikerê. Ciwanî bi nê hawayî eşkenê wayîrê şehîdanê Pirsûsî vejîyê û layîqê têkoşînê înan bibê.

Netîceya têkoşînê hemparî yê şaranê Kurdîstan û Tirkîya de faşîzmê AKP-MHPyî kewt verê rijîyayîşî. Hêriş û qirkerdişê ci do nêeşkê AKP-MHPyî bxelisnê. Faşîzmê AKP-MHPyî qetî do bin bikewo. Têkoşîno hempar ê şaranê Kurdîstan û Tirkîya xeta şehîdanê Pirsûsî de do peynîya AKP-MHPyî bîyaro, çareserîya meseleya kurdan, demokratîkbîyayîşê Tirkîya û rojhelatê Mîyanênî bîyaro ca. Rejîmê AKP-MHPyî ewro zî Rojawanî rê gefan waneno. Senî ke vizêr şehîdê Pirsûsî wayîrê Şorişê Rojawanî vejîyayî, ganî ewro zî bi heman ruhî wayîrê Şorişê Rojawanî bêro vejîyayene û faşîzmê AKP-MHPyî bêro çinkerdene. Seba ke têkoşînê vera faşîzmê AKP-MHPyî bireso serkewtişî ganî sere de ciwanê Kurdîstan û Tirkîya her kes xeta şehîdanê Pirsûsî de bêrê yewca û têkoşînê hemparî pîl bikerê.

Ma sey têgêrayîşê azadîya kurdan reyna eşkera kenê ke goreyê sozê ma yê seba şehîdanê Pirsûsî û pêro şehîdan ma do têkoşînê hemparî hîna zaf xur bikerê û têkoşînê azadî û demokrasî de serkewtişî dest bivisnê û hêvîya hempare ya cuya azade ya şaranê Tirkîya û Kurdîstanî bîyarê ca. Bi na bawerîye ma reyna şexsê şehîdanê Pirsûsî de pêro şehîdanê şoriş û demokrasî bi rêz û minetî yad kenê. Ma reyna soz danê ke ma do têkoşînê şehîdan biresnê serfîrazîye.''