Hemserekîya Konseya Rayberdişî ya KCKyî bi eşkerayîyêke hêrişê vera Hêzanê Pawitişî yê Sûryanîyan şermezar kerd. Eşkerayîye wina ya:

''28ê sibate de dewleta tirke ya îşxalkere û kolonyalîste hêrişê Hêzanê Pawitişî yê Sûryanan kerd û 3 şerwanê Sotoroyî netîceya hêrişî de şehîd bîyî û 2 şerwanî zî birîndar bîyî. Şexsê şehîdanê Sotoroyî de ma pêro şehîdanê ma bi rêz û minetî yad kenê. Ma keyeyanê şehîdan û şarê Rojawanî rê serweşîye wazenê. Ma nê hêrişê barbarî şermezar kenê.

Dewleta îşxalkere bi nê hêrişê xo ancî mojna ke a dişmena şaran a. Feraset û sîyasetê dewleta tirke azadîya şaran ra tersenê coka hêrişê şaran kenê. Dewleta îşxalkere bi hîsanê nefret û kînî hêrişê Şorişê Rojawanî kena û qirkerdişan kena. Ma nê hêrişan şermezar kenê û venga pêro şaran danê ke vera nê dişmenê vergî paştdayîşê xo xurtêr bikerê, bi hawayêkê hemparî pawitişê welatî xurtêr bikerê.

Şarê asûr-sûryanîyan şaranê Mezopotamya yê qedîman ra yew o, wayîrê mîrasêkê kulturelî yo û sey şaranê bînan raştê zaf qirkerdişan ame. Dewleta tirke ya îşxalkere vera asûrî û sûryanîyan qirkerdiş kerdbi. Şarê asûrî û sûryanîyan nê dejan ra vejîya û mîyanê Şorişê Rojawanî de bi wayîrê destkewteyan.La dewleta tirke ya îşxalkere ancî kena ke nê şarî qir bikera. Bêvengîya dewletanê dinya zî îsbat kenê ke ê zî hemkarê sûcanê dewleta tirke yê. Ganî merdimî na rewşe bivînê, bawerîya xo bi hêz û yewîya xo bîyarê ca û nê esasî ser o têbigêrê.

Dewleta tirke ya îşxalkere seba ke şarê kurdî şaranê Rojhelatê Mîyanênî de paştdayîş keno, kokanê kolonyalîzmî û qirkerdişî lerzneno û kayanê dişmenî pûç keno dewleta tirke hêrişê ci kena.  Nika zî îqtîdarê AKP-MHPyî bi hêrişanê xo paştdayîşê şaran bişikno. Hêrişê vera hêzanê Sotoroyî zî bi nê armancî ame kerdene. Dewleta tirke azadîya şarê asûrî û sûryanîyan ra tersena. Coka Roja Ziwanê Dayîke de wexto ke bi sûryankî qiseykerdiş amebi kerdene no hêriş zî ame kerdene. Ganî şarê asûrî-sûryanîyan çarçewa neteweya demokratîke de yewîya xo xurtêr bikero û bi têkoşînê yewbîyayeyî plananê qirkerdişî yê AKP-MHPyî çin bikero.

Ma ancî şarê asûrî-sûryanîyan rê serweşîye wazenê û birîndaran rê şîfaya xeyrîne wazenê. Ganî şarê asûr-sûryanîyan sey şarê kurdî erdê xo terk nêkero û şaranê bînan reyde erdê xo bipawo.''