Hemserekîya Konseya Rayberdişî ya KCKyî bi eşkerayîyêke Seyîd Riza û embazê ci yad kerdî ke 15ê teşrîna peyêne ya 1937î de bi komployêkî tepişîyabî û dima ameybî dardekerdene.

Eşkerayîye wina ya:

''Seyîd Riza û embazê ci seba vindarnayîşê hêrişan û çareserkerdişê meseleya şîyî Xarpêtî. La 15ê teşrîna peyêne ya 1937î de hetê dewleta tirke ra çarçewa 'Heraketê Dêrsimî' de bi komployêkî tepişîyayî û ameyî dardekerdene. Serrgêra dardekerdişê înan de ma Seyîd Rizayî û embazanê ey ê rayberanê kurdan ê bînan bi rêzî yad kenê.

Dewleta tirke ya kolonyalîste serranê 1937 û 1938î de Dêrsim de qirkerdişê tewr pîlî û barbarîyê tarîxîyî kerdî. Dêrsim û dormeyê ci de bi des hezaran kurdî bi çek, singu û gazanê kîmyewîyan ameyî qetilkerdene. Ma ancî qurbananê nê qirkerdişî bi rêzî yad kenê. Ma dewleta tirke ya qirkere bi hêrs û şîdetî şermezar kenê. Şarê kurdî qetî Terteleyê Dêrsimî xo vîr a nêkero, qetî hesabê ci biperso.

Bêguman Terteleyê Dêrsimî de barbarîya dewleta tirke û dişmenîya ci ya vera kurdan bi zelalî eşkera bîyî. 1937-38 de Dêrsim de qirkerdişêko tewr pîl ame kerdene. Nê qirkerdişî de bi singuyan pîzeyê cinîyanê diganan qelişîyayî û pitê zereyê pîzeyî ameyî qetilkerdene. Merdimê ke remayî înan koyan de zereyê şikefteyan de xo nimit la ê zî pê çekanê kîmyewîyan ameyî qetilkerdene. Na dewleta zalime ra hesabpersayîş erkê pêro kurdan û kesanê wayîrexlaq û wijdanan o. Heta ke hesabê ney nêpersîyo merdim nêeşkeno raşt biciwîyo yan zî bibo wayîrê heqîqatî.

Dewleta tirke bi nê terteleyî waşt ke kurdan qir bikera. Terteleyî ra dima dewleta tirke bi surgun û asîmîlasyonî ney rê dewam kerd. Dewlete seba meşrûkerdişê nê qirkerdişî îdîa kerd ke şarî sere wedarito la no raşt nîyo. Şarê Dêrsimî teyna heqê xo yê ziwan, nasname û kulturî waştêne. Çîyê ke Dêrsim de qewimîyayî qatlîam û qirkerdiş bîyî. Eke Tirkîya wazena aver şora no teyna bi hesabpersayîşê qirkerdişan, teriknayîşê înkarî û şinasîyayîşê kurdan beno. 

Ma ancî şexsê Seyîd Riza û Besêyan de kesê ke Terteleyê Dêrsimî de ameybî qetilkerdene yad kenê û sereyê xo verê vîrameyîşanê înan de anê war. Ma ancî pêro şehîdanê şoriş û demokrasî bi rêz û minetî yad kenê û sozê xo yê seba şehîdan dibare kenê. Seyîd Riza û embazan qetî teslîmê dewlete nêbîyî û bi nê hawayî înan peyê xo de mîrasêko pîl verda. Şarê kurdî nê mîrasî ser o qetî vera qirkerdişan teslîm nêbeno û xo ver dano. Tewirê Seyîd Riza û Şêx Seîdan seba ma wayîrê cayêkê girîngî yê. PKKyî no tradîsyonê xoverdayîşî vurna xetêka bêmabêne ya têkoşînî, şarê kurdî newe ra vet werte. Şarê kurdî do bi xoverdayîş û têkoşînî armancê xo yê cuyêka azade, Rayberêkê azadî û welatêkê azadî qetî bîyaro ca. Bi caardişê nînan zî dişmenê qirkerî ra hesab biperso.''