Vilakerdoxê Rojnameyê Ozgur Gundemî Orhan Karaagar serrgêra 31ine ya qetilkerdişê xo de serê gorê xo de ame yadkerdene.

Taxa Koçartî ya Wanî de sere de keyeyê Karagarî, Hemserekê DFGyî Serdar Altan, îdarekarê Rêxistina DEM Partî ya Wanî û Mayê Haştîye xeylêk merdim û rojnamegerî tewrê merasîmê yadkerdişî bîyî.

Merasîm de hêverî Temsîlkarê DFGyî yê Wanî Adnan Bîlenî qisey kerd û pare kerd ke Orhan Karaagar hetê dewlete ra kişîyayo. Bîlenî vat: ''Ma do heta peynî biwazê ke kiştoxê ey wa bêrê muhakemekerdene û seba ney têkoşîn bikerê.''

Serdar Altanî zî ard ziwan ke Karaagarî tim seba raştîyan têkoşîn kerdo coka ameyo qetilkerdene. Altanî vat: ''Tradîsyono ke embazanê ma yê sey Karaagarî peyê xo de verdayo ewro dewam keno. Çapemenîya kurdan xêrê bedelanê embazanê ma ra ewroo payan ser de ya.''

Birayê Karagarî Nîzam Karaagaro ke 30 serran dima zîndanî ra vejîyabi vat: ''31 serrî qedîyayê la hema dejê ma teze yo. Ma do hertim wayîrê armancanê birayê xo vejîyê.''