Hemsereka Komeleya Heqanê Merdiman (ÎHD) û huqûqnase Erene Keskîn şerê mabênê Hamas-Îsraîlî ANFyî rê ercna.

Erene Keskîn destpêk de vist vîrî ke huqûqo mîyanneteweyî dinya de 'huqûqêk' o ke hetê dewletanê serdestan ra ameyo amadekerdene û îfade kerd ke tîya de dirîtîyêke est a. 

Keskîne vat: ''Hem huqûqî amade kenê hem zî binpay kenê. Gelo rexneyê Amerîka, ewropa, Tirkîya yê serê Îsraîlî çend raşt ê? Peymanê mîyanneteweyîyî bîyê hacet ê ke pê sûcanê dewletan yenê mîyankerdene. Peymana Cenevre de hêrişê vera nêweşxaneyan qedexe yo. Ewro Îsraîl hêrişê nêweşxaneyan û waranê sivîlan keno, gelo Tirkîya Rojawan de goreyê Peymana Cenevre têgêrena? Pêro dewlete peymanan binpay kenê. Huqûqo mîyanneteweyî huqûqêk o hetê dewletanê serdestan ra ameyo afernayene. No huqûq xêrê têkoşînê heqanê merdiman ra ameyo viraştene.

Neteweyê Yewbîyayeyî (NY)ganî verê şer û gefan bigêrê la NY heman wextî de yeno manaya Amerîka. Eke Amerîka seke nimûneya Îsraîlî de dîyeno yew şerî tesdîq bikera uca de NY hînî erkê xo nêkeno.''

Erene Keskîn pare kerd ke îqtîdar û dewleta tirke Îsraîlî rexne kenê la derheqê babeta kurdan de Îsraîlî ra xirabêr ê. Keskîne vat: ''Dewleta tirke hêrişê kurdan kena, partîyan qefilnena, sîyasetmedaranê kurdan tepişena. Rewşa kurdanê Tirkîya xirabêr a. Her kes ronişto, Îsraîlî rexne keno. La kerdişê dewleta tirke ê Îsraîlî ra xirabêr ê.''

Erene Keskîn bale ante ser ke Filîstîn de hêzê haştîyaneyî, rêxistinê şorişgêr û sosyalîstî est ê ke hetê Hamasî ra yenê astengkerdene. Keskîne vat: ''Ez Hamasî sey rêxistina şîdetî pênase kena. Ganî ma paştî bidê têgêrayîşanê haştîyaneyan ê Îsraîl û Filîstînî, paştî bidê musewîyan. Ganî paştdayîşê bi haştîye, heqanê merdiman û sosyalîstan bêro pîlkerdene. Ganî şarê bindestî û têgêrayîşê haştîyaneyî destêkê xurtî bivînê. Çimê mi de mekanîzmaya kontrolî ya esase mekanîzmaya kontrolî ya sivîl a. A raşte pêro dewletî sey Tirkîya rêxistinê milîtarîst ê. Coka ganî seba ke verê şerî bêro girewtene paştdayîşê bi têgêrayîşanê haştîyaneyan bêro xurtkerdene.''