Tecrîdê serê rayberê şarê Kurdî Abdullah Ocalanî yo girankerde dewam keno. Ocalano ke tewr peynî menga Êlule ya serra 2016î keyeyê xo dir pêvînayîş viraştibi, a roje ra xebere ci ra nêgîrîyena. Hemsera ÎHDyî Eren Keskîne derheqê tecrîdê serê Ocalanî û grevê vêşanîye ya Leyla Guvene de ANFyî rê qisey kerd.

Keskîne vat Zîndanê Îmrali de roja ewilêne ra tecrîdo girankerde yeno bicaardene û prosesê aşitî de qe mebo tecrîd amebi şenikkerdene, la nika tecrîdî sînorê Îmraliyî vîyartî.   

QERARÊ KE DERHEQÊ OCALANÎ DE GÎRÎYAYÊ SÎYASÎ YÊ

Keskîne ard ziwan ke Tirkîye bi tecrîdê serê Ocalanî heme qanûnî girewtê binê payan û nê vatî: “Bi nê hawayî Tirkîye wazena ke îşkence meşrû ramojno. Ma sey pawitoxê heqanê merdiman nê îşkenceyî bi tu hawayêk qebûl nêkenê.”

Keskîne hemverê redkerdişê muracatê seba wedartişê îşkenceyî yê serê Ocalanî de ke Mehkemeya Heqanê Merdiman a Ewropa rê kerdibi de zî reaksîyon ramot û vat: “Gama huqûq de qerarêk gîrîyeno nasnameyê şexsî ra nêno ewnayene. Çîyo muhîm estbîyayîş yan zî çinbîyayîşê îxlalê heqî yo. La çi heyf ke sey Tirkîye welatê Ewropa zî qeraranê sîyasîyan gênê. Qerarê MHME zî huqûqî nê sîyasî yo. Eke MHME tenya tecrîdî zî bigirewtêne îtîbar ganî qerarê redî nêdayêne.”

HETA NIKA MA XEYLÎ MERDIMÎ KERDÎ VÎNDÎ LA MA NÊWAZENÊ LEYLA GUVENE VÎNDÎ BIKERÊ

Keskîne derheqê grevê vêşanîye yê Leyla Guvene ke seba wedartişê tecrîdî dabi destpêkerdene û kewto roja xo ya 24. zî nê vatî: “Ma sey ÎHD hemverê grevanê vêşanîyan ê bêdem-bêagêrayîşan ê, la xeylî wextan tepişteyî seba ke biresê heqanê xo çalakîyanê bi nê tewiran virazenê. Waştişê Guvene waştişê qanûnî yê. Ma do sey pawitoxê heqanê merdiman paştî bidê Guvene. Ganî organîzasyonê demokratîkî zî bêveng memanê û paştî bidê Guvene. Ma heta nika xeylî kesî vîndî kerdî la ma nêwazenê Leyla Guvene vîndî bikerê.”

GUVENE: WA ÇEW SEBA KE  EZ PEYNÎ RO ÇALAKÎYA XO BIYARÎ MEYERO SERDANA MI

Keskîne vat gama ke ê şîyê serdana Guvene û persayo ke çira çalakîyêka winayêne daya destpêkerdene aye nê vatê: “Serê Ocalanî de tecrîdo girankerdene yeno bicaardene, seba peynîbiciardişê tecrîdî mi na çalakî daye destpêkerdene. Verî demeyêk cigêrayîş û dîyalogê seba aşitî virazîyayî, nika zî eşkenê bêrê viraştene. Ez seba xo nêkewta nê grevî, ez seba tecrîdo ke Îmralî ser o yo û zîndananê bînan ser o yo wedarîyo kewta nê grevî. Ez umîd kena ke çew seba peynîbiciardişê çalakîya xo meyero serdana mi. Heta çalakîya mi bireso amacê xo ez do çalakîya xo bidomnî.”