Emîne Şenyaşara ke 2 laj û mêrdeyê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta edaletî rê dewam kena.

Keyeyî şar û avûkatî derheqê mehkeme de agahdar kerdî û seba ke waştişname bido şi Serdozgerîya Komare. Keyeyî da zanayene ke înan heta nika seba muhakemekerdişê 23 kesan zaf waştişnameyî dayî la cewab nêdîya înan.

Keyeyê hesabê xo yê twitterî ser o vat: ''Pawitişê sûcdaran û vergirewtişê muhakemebîyayîşê înan sûc o. Hemkarîya sûcî ra fek vera bidê. 23 kesê ke nêweşxane de qirkerdiş kerd ameyî tesbîtkerdene. Ganî nê kesî bêrê muhakemekerdene.''