Keyeyê Şenyaşarî Riha de xoverdayîşê xo rê dewam keno. Keyeyî pare kerd ke dîmenê qirkerdişî hetê dewlete de estê. Reyna Amed, Mêrdîn û Wanî ra semedê paştîdayîşî Şenyaşarî ameyî zîyaretkerdene.
Emîne Şenyaşara ke mêrde û lajê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de roja 86. de çalakîya xo ya nobeta edaletî rê dewam kena.
Ferît Şenyaşarî ewro da zanayene ke ê têna edalet wazenê û vat: ''Dîmenê qirkerdişî Serdozgerîya Komare ya Riha de yê. Ma wazenê dosya ser o bira nimite bêra wedaritene. Serdozgerîya Riha û mehkeme sûj kenê. Heta ke edalet bêro caardene ma do tîya de ronişê. Wa merdimê wayîrwijdanî paştî bidê ma ke sûcî vejîyê werte.''
Dayîke Emîne Şenyaşar zî pare kerd ke Erdogan û Suleyman Soylu zî zanenê ke tûtê aye senî kişîyayî. Emîne Şenyaşar vat: ''Tûtê mi nêweşxane de verê çimanê her kesî de kişîyayî. Çira qeydê nêweşxaneyî eşkera nêbenê. Kiştoxê tûtanê mi Pirsûs de gêrenê.''
Hetê bînîra ewro Amed, Mêrdîn û Wanî ra îdarekarê HDPyî û Egîtîm Senî û endamanê BASK-DERî Keyeyê Şenyaşarî zîyaret kerd û paştî daye xoverdayîşê înan ê heqdarî.
