Seba ke tecrîdê serê Rayberê Şarê Kurdî Abdullah Ocalanî bêro wedaritene grevê vêşanîye yê bêdem û bêagêrayîşî dewam kenê û hetê bînî ra zî têkoşînê keyeyanê girewteyan. Dayîkê ke her roje polîsê Tirkî hêriş bi înan kenê, fek xoverdayîşê xo ra nêverdanê. Çalakîya roniştişî ya ke dayîkan vernîya Hepisxaneyê Gebze de daya destpêkerdene, sere de Amed de xeylî bajaran de vila bîye. Dayîkanê girewteyan ra Sultan Bozkurte û Hatîce Soylera ke 31 rojî yo vernîya Hepisxaneyê Gebze de çalakîya roniştişî kenê ANF’yî rê qisey kerd.

Sultan Bozkurte, dayîka Newroz Bozkurt a ke kênaya ci 21 serrî yo seba ke hetkarîye daya Têkoşînê Azadîye yê Kurdan hepisxane de ya û cezaya bêpeynîye ci rê ameya birnayene, qalê çalakîya xo ya vernîya Hepisxaneyê Gebze kerd. Bozkurta ke Qoser ra ya, qalê zext û tehdîtanê polîsan kerd û vat, “Ez tehdîtanê înan ra nêtersena, seba ke ez bi hîsanê dayîkan kena. Mi tu cara hîsanê dayîkan ra dûrî çîyêk nêkerdo. Seba mi tu qedexeyêk çin o, seba ke dayîkî nênê qedexekerdene. Ez qedexeyan nas nêkena. Ez seba domananê xo kena.”

Ez Dayîk a Qedexeyan Nas Nêkena!

Bozkurte vat vera zextê polîsan hetkarîya ke rayapêroyî  daya kêm a û vat, “Dewleta Tirkî ma fam nêkena, la çira şarê Kurdî zî ma fam nêkeno? Çira  ma vernîya hepisxaneyan de teyna ca verdano? Domanê ma teyna seba ma nêkewtî uca. Seba şarê  Kurdî, seba hema binpankerdîyan kewtî hepisxaneyan. Tecrîd teyna serê Ocalanî de çin o, serê heme Kurdan de esto. Seba ke tecrîd bêro wedaritene ganî merdim wayîrê cesaretî bo.” Bozkurte vat,  ê 31 rojî yo vengdayîş kenê û vengdayîş bi şarê Kurdî kerd ke na bêvengîya xo bişikno. Wa êdî qîrayîşê ma bêrê heşnayene û leyê ma de bê. Wa tecrîdî bişiknê. Roja dayîkan de xelata ma domanê ma yê. Eke tecrîd nêwedarîyo, cenazeyê domananê ma do hepisxaneyan ra bivejîyê.”

Rengê Hesiranê Çimanê Ma Cîya Nîyê

Hatîce Soylere, dayîka Ozlem Soylera ke Hepisxaneyê Gebze de 16’ê Kanûne ra nata grevê vêşanîye de ya, vat, “Waştişê domananê ma waştişê ma yê, ma leyê înan de yê. 7 hezar domanê ma grevê vêşanîye de yê. Teyna seba Ocalanî ney, seba heme Kurdan o no tecrîd. Ez vengdayîş bi şarê Kurdî kena, ma dayîk ê. Dejê ma yew ê.”