Keyeyê tepişteyanê nêweşan û tepişteyanê ke înfazê înan ameyo vêşnayene roja 249. de verê Zîndanê Amedî de Nobeta Edaletî de ameyî pêser. Temsîlkar û îdarekaranê MEBYA-DER, MED TUHAD-FED, TUAY-DER, OHD, DBP û HDPyî zî paştî daye nobete.

Nameyê keyeyan ser o Reşahate Adaya ke waya tepişte Hamdusena Ada ya, qisey kerd û vat: ''Zulm dewam keno. Ma hînî nêwazenê zîndanan ra cenazayî vejîyê. Ma reyna vanê ke heta çilka peyêne ya gonîya xo hetê domananê xo de bibê, heqanê tepişteyan bipawê.''

Dadîya tepişte Azîz Tufanî Yesure Tufan vat: ''Ma wazenê wa tecrîd biqedo. Tirkîya de eke huqûq û edalet est bibîyêne ma 9 mengî yo tîya de nêgêrayêne edaletî.''

Çalakîye pê slogananê sey 'Biciwîyo xoverdayîşê zîndanan', 'heq, huqûq, edalet' qedîyaye.