Koordînasyonê KJKyî vat: ''Ma bi îdîa yê. Ma qerardar ê ke emser bikerê serra azadîya Rayber Apoyî.'' KJKyî venga pêro kurdan da ke tewrê rayraşîyayîşê Kolnî yê 17ê sibate bibê û a roje bivurnê rojêka tarîxîye.
Koordînasyonê KJKyî bi eşkerayîyêke bale ante grevê vêşanîye yê zîndanan, Nobetanê Edaletî, çalakîyanê Kurdîstanî û Ewropa ser. Eşkerayîye wina ya:
''Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de her cayê Kurdîstanî û dinya de çalakîyê wendişê kitabanê Rayberîye, kartpostalan, grevê vêşanîye yê zîndanan û nobetê edaletî yenê kerdene. Ewropa de zî Rayraşîyayîşo Derg bi coşî dewam keno. Ver bi 15ê Sibate ganî çalakîyê kurdan hîna xurt bibê û tesîrêkê pîlî virazê. No do dewleta tirke ya faşîste, hêzanê komplogeran û qirkeran rê bibo cewabêk.
Grevê vêşanîye yê zîndanan roja 68. de yo. Zîndanî ê cayê ke tede dewleta tirke ya faşîste kena ke îradeyê şorişgêra û demokratan teslîm bigêra û bi nê hawayî hêvîya komelî bişikna. La nê cayî derban danê faşîzmî ro. Grevê vêşanîye mojneno ke embazê ma yê zîndanan wayîrê mîrasê xoverdayîşê zîndanan vejîyenê û nê mîrasî bi xoverdayîşê xo pîlêr kenê.
Sere de dadîyê ma seba paştdayîşê grevê vêşanîye merdimê tepişteyan zî nobetanê edaletî kenê. Ma xoverdayîşê înan selam kenê û venga her kesî danê ke dormeyê nê xoverdayîşî de bêro yewca. Dadîyê ma seba cuyêka azade ganê xo kenê çeper. Têkoşînê dadîyanê ma mizgînîya serkewtişî ya.
Hetê bînî ra Rayraşîyayîşo Derg ê 25 rojan Parisî ra ver bi Strasbourgî dewam keno ke na çalakîye zî zaf manadar û girîng a. Ma pêro çalakîkeranê nê rayraşîyayîşî selam kenê. Na çalakîye seba caardişê azadîya Rayber Apoyî derbazê tarîxî do biba. Her gama ke seba azadîya Rayber Apoyî erzîyena vatiş û xoverdayîşêko tarîxî yo.
Çalakîyê pêro Kurdîstanî vera komplogerîye û qirkerîye tarîxê azadîye newe ra nusenê. Îradeyê kurdan, cinîyan û bindestan dormeyê azadîya Rayber Apoyî de welat, merdim, cinî û camêrdanê azadan aferneno. Her rayraşîyayîşo ke seba azadîya Rayber Apoyî yeno kerdene rayraşîyayîşê azadîya cinî û şaran o.
Rayber Apo rayberêko winayên o ke zerrîya bi mîlyonan merdiman de wayîrê cayêkî yo. Ma bi îdîa yê. Ma qerardar ê ke emser bikerê serra azadîya Rayber Apoyî. Roje roja şiknayîşê tecrîdî û caardişê serkewtişî ya. Nê esasî ser o ma venga pêro cinî, ciwan, şorişgêr, demokrat û dostanê enternasyonelan danê ke 17ê sibate de tewrê rayraşîyayîşê merkezî yê Kolnî bibê. Ma pîya mîtîngê Kolnî yê 17ê sibate bivurnê rojêka tarîxîye!''
