Konseya Rayberdişî ya KNK'yî derheqê peyserancîyayîşê  hezanê Koalîsyonê Mîyanneteweyî yê sînorê Vakur û Rojakewtena Sûrîye û tehdîtanê dewleta Tirkî yê seba hêrişanê îşxalkarîye eşkerayîyêka nuştekîye weşana.

Eşkerayîya KNK'yî wina ya:

"Îdareyê Vakur û Rojakewtena Sûrîye Tirkîya tehdît nêkeno û a tehdît nêkerde. Destpêkê Şorişê Rojawanî ra heta nika, dewleta Tirkî dişmenîya nê îdareyî keno. Pêroyê hêzanê verba Kurdan ê sey DAÎŞ, El Nusra û ê sey bînan rê paştî dana û ê erşawitî sêneyê Rojawanî. Wexto ke nê hêzî ser nêkewtî, dewleta Tirkî bi xo tê gêrîya û hêriş kerd. Hêrişo nikayêno ke rojdem de yo, sey hêrişê serê Kobanê,Cerablus û Efrînî yo. Ça yê dinya de beno wa bibo, dewleta Tirkî verba pêroyê destkewteyanê Kurdan a. Pêro vateyê bînî behane yê. Nê asayîşê dewleta Tirkî kewto tehlûke ne zî agêrayîşê multecîyan xemê dewleta Tirkî de yo. Nê pêroyî propagandaya zûran a. Rastîye naya ke dewleta Tirkî dişmenê şarê Kurdî ya û hêrişê Kurdî û hemkaranê înan kena. Nika Rojawanê Kurdistanî binê hêrişêko pîl de yo. Hêzê Rojawan sey xoverdayîşê Kobanê û Efrînî do xo ver bidê. Ganî her Kurd her Kurdistanij ça yê cîhanî de benê wa bibê, bi ruhê seferberîye, bi çalakîye û pêro firsendanê xo verba dewleta Tirkî bibê yew, xo ver bidê û wayîrê rojawanî bivejîyê. Ewro roje roja xoverdayîşî yo. Xoverdayîşî ra ber rayîrêko bîn çin o. Vengdayîşê ma sere de ciwanan rê pêroyê şarê Kurdistanî rê yo; ma vanê wext wextê seferberîye yo, her ca û ware de wurzê xo ser. Bi na wesîle ma reyna veng danê pêroyê Kurdistanijan  ke wayîrê erjê xo bivejê û xo ver bidê."