Kombîyayîşê 18. ê Kongreya Neteweyîye ya Kurdistanî  bajarê Baarlo yê Hollanda de ame viraştene. Hemserekê KNKyî, endamê ci, endamê heyetê îdarekarî û 4 perçeyanê Kurdistanî ra temsîlkarê partîyanê sîyasîyan û organîzasyonan tewrê ci bîyî.

Kongre de ame vatene ke perçebîyayîş zaf zirar dano kurdan ro û heta kurdî aşitîya zereyê xo nêvirazê do nêeşkê azad bibê. Perçeyanê Heyetê Pêroyî ra veng dîya PKK, PDK, YNKyî û partîyanê bînan ê Kurdistanî ke Kongreya Neteweyîye virazê. 

Kombîyayîş de 20 maddeyan ra beyannameyêk ame hadrekerdene û hetê hemsereka KNKyî Nilufer Koçe ra ame wendene.

PARTÎYÊ KURDAN GANÎ BI RUHÊ YEWBÎYAYÎŞÎ TÊBIGÊRÎ

Beyannameyî ra tayî maddeyî wina yî:

- Mucadeleyê kurdan zaf bedelî dayî û îşxalkarî ewro wazenê ke dewayê kurdan bifatisnî. Ganî vera naye partîyê kurdan bi yewbîyayîşî cewab bidî.

- Kombîyayîşê serrna yê KNKyî  do bibo ê serra 20. û bi na wesîleye xebatê ci hîna bi coş û bihêzî bêrî viraştene.

- Semedê azadîya Rayberê Şarê Kurdî Abdullah Ocalanî do bêmabên çalakîyî bêrî viraştene û rewşê ey rojdemî de bêro tepiştene.

- Hêrişo topyekun ke  Îran û Tirkîya kurdan rê kenî nînê qebûlkerdene û ma sey KNKyî îdarekaranê nê her di welatan ra wazenê ke na polîtîkaya herîşkare caverdî.

- Hukmatê Bexdatî ra ma wazenê ke wa vera kurdan edil bo û hukmatê Şamî zî wa nasnameyê kurdan qebûl bikero.

- Sere de Almanya ganî welatê Ewropa estbîyayîşê kurdan qebûl bikerî û qedexeyê PKKyî wedarî.

- Ewro Başûr û Rojawan de qezencê kurdan binê tehlukeyê hêrişê Îran û Tirkîya de yê. Amerîka û Rusya xeylî cayan de aktîf î. Ma sey KNKyî nînan ra wazenê ke semedê karê xo wa qezancanê kurdan meşuxulnî.

- Rêxistina Yewîya Miletan ganî paşt bido şerwananê Azadîye yê Kurdan. Kurdî her ca de raştê qirkerdişî ameyî û bedelê girdî dayî. Coka ganî Yewîya Miletan de bêrî temsîlkerdene.

- Çapemenîya kurdan ra zî waştişê ma wa weşano edil û azad bîkerî û semedê aşitîya zereyî xizmet bikerî.

- Heme cinî, gencî, nuştox, roşnîkar, rayberê îtîqatan wa rolê xo kay bikerî, seba aşitî çîyek bikerî.

-  Sere de asûrî, suryanî, keldanî, ermenî, yahûdî, roman, tirk, ereb, fars û îtîqat û şarî ke cografyaya Kurdîstanî de yê heme wayîrê qale yê û ma sey KNKyî estbîyayîş û mucadaleyê nê şaran zaf erjaye vînenî.

- Ma sey KNKyî bi hurmetê pîlî îdareyanê Başûr û Rojawanê Kurdîstanî ra wazenê ke semedê xurtkerdişê tekîlîya yewbîyayîşî wa gaman berzî.