Konseya Rayberdişî ya KNKyî derheqê cezaya dardekerdişî ya ke ciwananê kurdan Mazlum Dag û Mehmet Beşîksîzî rê ameye dayene de û derheqê şert û mercanê tepiştişê înan de eşkerayîyêke daye û veng da Îdareyê Başûrê Kurdîstanî. 

KNKyî bale ante cezaya dardekerdişî ser ke ceza ciwananê kurdan ê weltperweran Mazlum Dagî û Mehmey Beşîksîzî rê seba kiştişê Koseyî ameye dayene û vat: ''Eşkera yo ke Mehkemeya Hewlêrî bi hawayêkê lezî û bi cigêrayîşêkê kêmî na bire daye. Aseno ke heqê xopawitişî yo huqûqî zî hol nêame caardene û tepişteyî bê avûkatan mendî. Mehkeme rewşa şerê azadîya şarê Kurdîstanî, hêrişê dewleta tirke  û rewşa înan nêardî verê çimanê xo. Hetê bînî ra eke mehkemeya kurdan cezayêka winasêne bida welatperweran ruhê welatperweran de kişnena û komêlê Kurdîstanî de hîsê edaletî serûbin kena.

Dinya de cezaya dardekerdişî hînî nêna qebulkerdene. Eke na ceza qanûnanê Herêma Kurdîstanî de bimana seba ci kêmasîye bena. Ganî na ceza qanûnan ra bêra vetene. Goreyê xeberan nê ciwanê kurdî mîyanê cerganê DAÎŞî de yenê tepiştene ke na zî cuya înna visnena binê tehlûkeyî. Ma venga selahîyetdaranê Herêma Kurdîstanî danê ke na bire sererast bikerê û cuya merdiman bipawê. No têna waştişê ma nîyo, waştişê pêro welatperweranê Kurdîstanî yo. Ma bawer kenê ke selahîyetdarê Herêma Kurdîstanî do nê vengî bieşnawê, na rewşe bierxnê û bire sererast bikerê. Ma venga partî û rêxistinanê Kurdîstanî, rêxistinanê heqanê merdiman, rêxistinanê medenîyan û şarê Kurdîstanî zî danê ke na babete de hîsger bibê.''