KNKyo ke merkezê ci Bruksel de yo, 8 rêxistinanê Fîlîpîn, Myanmar, Burma, Kolombiya û Welatê Baskî  reyde pê mektubêk vengdayîşêk kerd. Mektub dezgehanê Neteweyan ê Yewbîyayeyan û xeylêk sazgeh û rêxistinan ê mîyanneteweyîyan rê ame erşawitene. Goreyê KNKyî mektubê vengdayîşî resa verê destê nê dezgehan. Mektub de ame waştene ke asta globale de adirbirnayîş bêro caardene û tepişteyê sîyasîyî bêrê veradayene.

Mektub wina yo:

''Sekreterê Pêroyî yê Neteweyanê Yewbîyayeyan Antonio Guterresî 23ê adara 2020î de seba adirbirnayîşê globalî veng dabi. 25ê adara 2020î de zî Komîsera Berze ya Heqanê Merdiman a Neteweyanê Yewbîyayeyan Michelle Bachelet veng da ke tepişteyê sîyasîyî, nêweşî bêrê veradayene. 3ê nîsane de Guterresî vengdayîşê xo dibare kerd.

Heta nika Tirkîya, Kolombîya, Îspanya, Myanmar û Îran têna sûcdarê edlîyî û krîmînalî vera dayî. Heyf ke tay welatî goş nêdanê vengdayîşê Neteweyan ê Yewbîyayeyan û jan seba xo sey firsendêk xebitnenê.

Vengdayîşê ma wina yo:

-Vengdayîşê seba adirbirnayîşî wa reyna bêro kerdene

-Meseleyê sîyasîyî pê rayîrê muzakereyan bêrê çareserkerdene

-Tepişteyê sîyasîyî wa bêrê veradayene

-Peynîya alozîyan wa bêra ardene û cepheyê neweyî yê leşkerî nêrê akerdene

-Wa hetkarîya merdimîye ya vera Covid-19 herêmanê şerî de Neteweyanê Yewbîyayeyan ser o û warane herêmîyan de zî dezgehanê komelê sivîlî ser o bêra vilakerdene

-Xebatkarê heqanê merdiman, pawitoxê heqanê merdiman û endamanê têgêrayîşê komelkî bi hawayêkê qanûnî, sîyasî û dîplomatîkî bêrê pawitene.''