Goreyê Wezîrîya Edaletî,  Tirkîya de 449 zindanî estî û kapasîteyê înan hendê 211 hezar û 274 kesan o. La rixmê naye 35 hezar û 152 hepsîyî serê nê kapasîteyî de tede manenî.

HEME HEQÊ HEPSÎYAN GIRÎYENE BINÊ LINGAN

Îdarekaranê Sîstemê Cezaya Înfazî de Komela Cimatî ya Sîvîle (CÎSST) ra Berîvan Korkute dîqet ant îhlakerdişê heqan ê zindanan ser û va: ‘‘10 serranê peyênan de zindanan de hûmara hepsîyan zaf zêdya. Koguşanê 12 kesîyan  de 30 kesî yenê cakerdene. Cayê rakewtişî çîn o. Hepsîyê nêweşî bi aşman nêresenî nêweşxeneyan.  Xora surgunî zî zêdyayî. Kitabî nêdîyenî tepişteyan û reyna heme heqê sosyalî ê înan dest ra yenê girewtene. Îşkenceyo ke hepsîyan rê beno, xebera şarî ci ra çîn a. Xora nêzdîbîyayîşo winayên zî esto ‘ zindan o beno‘. La meseleyê ke zîndanan de benî tena bi merdimanê hepsîyan  û çend komelan çare nêbenî. Ganî her hetî ra şar eleqa ramojno, paştî bidê hepsîyan. Eke ma pero pîya têbigêrî, ma eşkenê nê mesleyan çare bikerî.‘‘

BI TALÎMATÊ WEZÎRÎYA EDALETÎ ÎŞKENCE YENO KERDENE

Hemsereka  Komela Paştîdayîşê Zindanan Selma Altane zî dîyar kerd  ke zextê ke bi ameyîşê OHALî dest pêkerdbî, çend şino vila benî û wina domna: ‘‘Bitaybetî zî hepsîyê sîyasîyan ser o zext zaf o û no bi talîmatê Wezîrîya Edaletî beno. Heme zindanan de gardîyan û cendirmeyî seba provokasyonî ro tepişteyanê

sîyasîyan heqaret kenî. Xora hepsîyê nêweşî mergî rê terk bîyî. Sewqê nêweşxaneyî nêbenî û şartanê keratan de yenî tepiştene.‘‘

Hetê bînî ra goreyê xeberê muxabîrê ANFyî yê Wanî hukmatê AKPyî fatûrayê krîzê aborîyî zî barê hepsîyan kerda. Zîndanê Wanî de bi aşman o hepsîyî tena  nano wişk, berxul û şorbe wenî.