Telekomî cinîya kurda ke ziwananê bînanî nêzana ra waştbi ke  wa tirkî yan zî erebkî qisey bikere. Komeleya Ziwan û Kulturî ya Avesta, Komeleya Cigêrayîşanê Kurdan, Komeleya Ziwan û Kulturan ê Mezopotamya, Komeleya Cigêrayîşê Ziwanan tewirê Telekomî şermezar kerd.

Eşkerayîye ame vîrardene ke çend hefteyî verê cu zî Sûrê Amedî de destûrê muwludê kurdkî nêdîya û ame vatene ke Îran de zî musayîş û musnayîşê kurdkî qedexeyo ke yeno cezakerdene. Mehlimêka kurdkî rê 10 serrî ceza ameye dayene.

Eşkerayîye wina ame vatene: ''Telekomî eşkerayîya xo de vano ke ê qet kesî yewbînan ra cîya nêkenê. Eke raşt vanê, qey eşkerayîye de qet nameyê kurdkî ranêvereno û heta ewro înan qet kurdkî xizmetêk nêdayo. Nê qewimîyayîşî reyna ramojna ke înkar, asîmîlasyon û qedexeyî serê fermî û nefernî dezgehan ra dewam kenê. Ma sey dezgeyî nê zîhnîyetî şermezar kenê û reyna veng danê ke wa kurdkî her warê cuya de bêro şuxulnayene.''