Komploya Îmrali giran bena

Rayberê Şarê Kurdî Abdullah Ocalan ke bi Komploya Mîyanneteweyî rehîn girîyayo, a roje ra heta ewro dewleta tirkî bi tecrîdî heme huqûqo evrenselî gena binê lingan.

Serdozgerîya Komare ya Bursa, Hakimîya Înfazî ya 1. ya Bursa 6ê elula 2018î de derheqê Ocalan û hepsîyê bînî ke Girawa Îmrali de yê de qerarêko newe girewt. Goreyê ney dîyayîşê Ocalan û hepsîyê bînî Hamîlî Yildirim, Omer Hayrî Konar û Veysî Aktaşî bi avûkatanê înan 6 aşmî ame qedexe kerdene. Çîyê ke bîyî sebebê ceza zî cezayê hucreyî ke mabênê 2005 û 2009î de dîyayê Ocalanî û mektûba ke Ocalanî 2009 de nuşta û xeylê çîyê bînî.

2011 RA NATA PÊDÎYAYÎŞ ÇIN O

Avûkatanê Buroya Huqûqî ya Asrinî 27ê temuza 2011î ra nata bi Ocalanî dîyayîş nêviraştî.2017 de avûkatan 100, keyeyê ci zî 44 reyî seba dîyayîşî muracat kerdî la heme hetê Hakimîya Înfazî ya 1. ya Bursaye ra bi hawayo keyfî ameyî red kerdene. Pero bînî ra hîrê hepsîyê bînî ke Îmrali de yê, destûrê dîyayîşî înan rê zî çin o.

Dîyayîşê heyetê HDPyî zî 5ê nîsana 2015î ra dima tena dîyayîşêk viraziya. Nizdîye 50 sîyasetmedarê kurdan kewtî grevê vêşanî. Dima ra 11ê elula 2016î de Ocalan bi birayê xo Mehmet Ocalanî dîyayêşek viraşt.

BI SERRAN TENA MEND

Ocalan Îmrali de 16ê sibata 1999 ra heta 17ê kanûna 2009î tena mend. Dima ra 5 hepsîyê bînî Îmrali rê sevk bîyî, la Ocalan verê cû tena ame tepiştene.

Dewro peyên de derheqê ewleyî û weşîya Ocalanî de şikî zêdîyayî. Par aşma teşrîna verêne de derheqê cuya Ocalanî de xeberê şikinî vila bîyî. Serdozgerê Komare yê Bursa Ugurhan Kuşî eşkrayîyêk da la şar naye ra bawer nêkerd. KCKyî zî bi eşkerayîyêka nuştekî waşt ke wa na mesela safî bibo.

HEYETÊ MÎYANNETEWEYÎ ZÎ BÊCEWAB AMEYÎ VERDAYENE

Bajaranê cîya-cîyayan yê Ewropa ra zî parlamenter, sendîkakar, akademîsyen û akîtîstanê heqanê merdiman ra heyetêk Wezîrîya Edaletî ra waşt ke 17-18-19ê sibata 2017î de şêrî Îmrali, Ocalanî zîyaret bikerî la muracatê înan bêcewab mende.

AÎHM: ÎŞKENCE Û MUAMELEYO XIRAB

24ê adara 2014î de Dadgeha Heqanê Merdiman ya Ewropa daye zanayene ke şertê Ocalanî xirabin ê û Îmrali de îşkence esto. Avûkatanê Buroya Huhûqî ya Asrinî dîyar kerd ke peroyê heqê esasî yê Ocalanî topyekûn yenê asteng kerdene.

CPT BERPÎRSÎYARÎYA XO NÊANA CA

Komîteya Vernîgirewtişê Îşkenceyan (CPT) seba vernîgirewtişê tecrîd û îşkenceyê Îmrali wezîfeyê xo nêard ca. 28 û 29ê nîsana 2016î de Zîndanê Îmrali zîyaret kerd la seba ke Tirkîya destûr nêdayo, rapor eşkera nêkerd. CPT ewro zî vera tecrîdî de bêveng o û no zî beno sebebê hêrsê şarî.