Xeylêk şaristananê Vakurê Kurdîstanî û Tirkîya de Komployo Mîyanneteweyî yê 15ê Sibate ame şermezarkerdene.

Çewlîg de rêxistinanê DEM Partî û DBPyî pîya eşkerayîya çapemenîye daye. Hemserekê DEM Partî yê Çewlîgî Hasan Soysalî eşkerayîye wende. Soysalî ard ziwan ke bi komployî ame waştene ke hêvîya azadî û haştîye ya şaran bêra çinkerdene. Soysalî îfade kerd ke her wextî ra zêdeyêr girîng o ke azadîya Rayberê Şarê Kurdî bêra caardene.

Şirnex de polîsan bi bahaneya qedexeyî eşkerayîya verê DEM Partî asteng kerde coka eşkerayîye verê bîna de ameye dayene. Eşkerayîye ra verî Endama Şaredarîya Silopîya Fehîme Saruhan ameye destbendkerdene. Eşkerayîye de Mayê Haştîye, îdarekarê MEBYA-Derî zî amade bîyî.

Wan de Rêxistina DEM Partî bi beşdarîya xeylêk rêxistinan eşkerayîye daye. Eşkerayîye de sloganê sey 'Bijî Serok Apo' ame vatene. Eşkerayîye de bale ameye antene tecrîdê Îmraliyî ser û ame parekerdene ke şexsê Rayberê Şarê Kurdî Abdullah Ocalanî de şarê kurdî yeno tecrîdkerdene.

Rêxistina DEM Partî ya Mûşî merkez de kombîyayîşê çapemenîye kerd. 

Erdexan de bi beşdarîya xeylêk kesan kombîyayîşê çapemenîye ame kerdene.

Bedlîs û Colemêrg de zî serkêşîya rêxistinanê DEM Partî de eşkerayîyî ameyî dayene û azadîya Rayberê Şarê Kurdî ameye waştene.

Şaristananê Tirkîya Îzmîr û Mersîn de seba şermezarkerdişê tecrîdî eşkerayîyî ameyî dayene.